Magduha na ka tuig human sa paglatos sa bagyong Yolanda sa Central Philippines nakita na ang bunga sa rehabilitasyon ug recovery effort dili lang tungod sa nahimo sa gobiyerno kondili hasta sa paningkamot sa mga direktang naapektahan nga makabarog pagbalik gikan sa katalagman niadtong Nobiyembre 2013.
Sa nanglabay nga mga bulan, gisaway og maayo ang administrasyong Aquino tungod kay hinay ug palpak ang trabaho pagtabang sa mga naapektahang mga lugar.
Tinuod hinay kaayo ang lihok sa gobiyerno apan siniguro man nga maapod sa tanang nagkinahanglan ug sa hustong proseso ang paghatag sa mga hinabang.
Ning bag-ohay lang, ang opisyal sa United Nations special representative on disaster risk reduction nga si Margareta Wahlstrom nga bag-o lang miduaw sa Leyte aron pagsusi sa recovery and rehabilitation effort nga gihimo didto kay kini maoy labing naapektahan sa Yolanda.
Siya mismo nakaingon nga nadasig kaayo siya sa iyang nasaksihan kay paspas kaayo ang recovery sa mga lugar, nabalik na ang kadasig sa mga tawo nga mopadayon sa ilang normal nga kinabuhi, paspas ang mga konstruksyon, paspas nga nakabawi-bawi ang sector sa agrikultura ug uban pa.
Matud pa niya, kun ingon niini kapaspas ang rehabilitation and recovery sa mga dapit nga naigo sa Yolanda, duha nalang ka tuig ang paabuton inay nga napulo ka tuig (base sa ilang kasinatian sa UN) mausab na ang maong mga lugar. Unsa na lang kaha ang nahitabo kun wa nipailob ang gobiyerno sa mga pagsaway ug pagtamay sa ilang rehabilitation efforts?
Kun kada tugpa sa mga abyon ug dunggo sa mga barko nga nagdala og donasyon gikan sa ubang mga nasud ug ang mga kwartang donasyon diretso lang gipailog ngadto sa mga dapit nga naapektahan?
Dunay panultihon nga mas maayong mapailobon inay nga magmahay sa kataposan.
Angay magbantay sa mga tawong kusog manggamit sa makaluluoy nga kahimtang sa katawhan alang sa ilang kaugalingong interes.