Salapi pa more

Nakugang ang mga tigbalita sa Kongreso diha nga adunay puti nga sobre nga gipanghatag ngadto kanila nga may sulod nga tulo ka P500 apan ang nakabutang nga dagway sa salapi dili iya ni Senador Ninoy Aquino, kon dili, iya ni kanhi DILG Secretary Mar Roxas.

Gawas sa tulo ka pike nga kinyentos pesos, nakasuwat usab sa sobre ang pulong “SALAPI PA MORE! IBULSA ANG PERA, IBOTO ANG KURSUNADA.

Diin man diay gikan ang sobre? Dili ko interesado niini kay ang nakapa-interest nako mao ang kahadlok karon sa mga kaatbang ni Mar Roxas sa iyang kandidatora sa umaabot nga piniliay sa pagka presidente sa nasud.

Sa survey sa Pulse Asia ug SWS sa wala pa giendorso ni Presidente Noynoy Aquino si Mar Roxas, si Roxas anaa lang kini sa ikatulo ug ikaupat nga puwesto.

Apan human sa pagtuboy sa presidente kang Roxas nakuyawan na ang iyang mga kaatbang sa umaabot nga piniliay tungod kay nanglayat na ang daghang mga politiko nga gikan sa nagkalain-laing partido ngadto sa kampo ni Mar Roxas ug midaghan na usab ang iyang mga dumadapig.

Wa g’yud ko masayop sa akong mga pangagpas nga ang daghang nagpakahilom nga mga politiko nagpaabot lang sa pag-endorso sa presidente ug kun si kinsa ang iyang ituboy ug adto sila maglumbaanay sa pagpanglayat ug mao g’yud kini ang nahitabo karon.

Ang “Salapi pa More” nga propaganda maoy dako’ng buhing kamatuoran nga nahadlok na ni Mar Roxas ang iyang mga kaatbang tungod kay kun wala pa sila mahadlok kaniya dili unta sila mohimo sa maong matang sa dautang propaganda.

Si Mar Roxas mireklamo sa dautang propaganda ug angayan lang g’yud pud siya nga moreklamo niini tungod kay kun ako pa ang anaa sa iyang dapit, dili ko gusto nga mabutang ang akong nawong sa piki nga salapi.

Ang gusto nako nga mabutang mao ang akong ngalan ug pirma sa tinuod nga salapi.