Damgo sa Mandaue

Dili aksidente ang problema sa trapiko sa Mandaue, matud ni Konsehal Lollipop Ouano-Dizon atol sa forum sa mga estudyante sa Benedicto College niadtong miaging semana diin iyang gibatbat ang iyang mga plano ug damgo alang sa siyudad sa Mandaue kun mahimo siya nga mayor.

Matud sa konsehal nga resulta sa kakulang sa “planning” ug “political will” ang problema sa trapiko sa Mandaue.

Tinuod g’yud. Sa siyam ka tuig nga pagka mayor ni Jonas Cortes, moderetso ra g’yud siya og desisyon pagsira o pagbukas sa karsada nga wala’y plano sa kinatibuk-ang dagan sa trapiko.

Tungod sa nasubrahan nga pamolitika ni Jonas, bisan kun may mamatyan tugotan kini nga ipaabot sa tunga sa karsada ang mga tent sa mobilar nga makabalda sa trapiko ug dunay mga balay-patigayon nga pasagdan nga maka-parking sa ilang delivery truck bisan sa huot nga mga dalan ug mo-U turn o mo-left turn bisan asa.

Morekomendar si Lollipop sa Metro Manila Development Authority nga mohimo og traffic study sa Mandaue.

Nahisgotan usab ni Lollipop ang suliran sa baha. Matud niya P150 milyones ang nagasto sa Mandaue, wala’y labot sa P253 milyones sa DPWH, apan wala’y kasulbaran ang baha. Siyam ka tuig nga pamunoan ni Jonas, wala’y drainage plan nga gipatuman. Damgo sa apo ni anhing mayor Pedong Ouano nga mahimong livable city ang Mandaue bisan sa mga suliran sa trapiko, baha, basura, sa Mandaue City College ug puy-anan sa mga kabus nga giatubang sa kasamtangang pamunoan. Usa sa iyang iduso ang laing reclamation project sa Paknaan-Labogon area.

* * *

Mi-resign na si DILG Secretary Mar Roxas aron dili maduhigan og politika ang maong ahensiya. Gihulip kaniya si Kongresista Mel Senen Sarmiento nga taga Samar.

Kanus-a kaha usab mo-resign si Senador Grace Poe pagka senador ug si Bise Presidente Jejomar Binay? Kun dili nato gusto mapintalan og pamolitika ang gobiyerno, silang tanan, apil na si Mayor Rody Duterte angay usab diay mo-resign?

Nadungan ning pag-resign ni Roxas ang pagkatap og envelop sa Kongreso nga naabot sa press corps nga adunay sulod nga tulo ka pekeng tag-P500 nga adunay dagway ni Roxas.

Mituyok na g’yud ang black propaganda batok ni Roxas. Ngano kaha? Kun ang ubang kampo ang pasultion, hinay kaayo si Roxas. Apan kun hinay siya, nganong biktimahon pa man siya sa black propaganda? Balik ni Poe, duha pa ka semana una siya mopahibalo sa iyang plano sa 2016. Natandog ba kaha kini siya sa nag-ung-ong nga disqualification case sa Senate Electoral Tribunal nga seryoso’ng naminaw sa iyang kaso sa citizenship?

Gawas ning isyu sa citizenship, milutaw karon ang iyang pagka-“trapo” (traditional politician) kun manubag sa mga isyu sama sa isyu sa Iglesia ni Cristo.