EDITORYAL - Background check

Hapit na ang filing of certificates of candidacies alang sa mga nangambisyon og posisyon sa 2016 Elections, kini ang rason nganong pwerte nang daghana og mga political ads nga nag-promote sa nagkalain-laing mga kandidato, sagad kanila mga kandidato sa national positions.

Sa mga political ads, pwerteng kombate sa mga partido pagpahumot sa ilang mga manok. Pokus sa ilang panghaylo mao ang karakter kunohay sa ilang kandidato nga kini maayong tawo, manggiluluy-on, maayo moserbisyo sa publiko, utokan, kasaligan ug uban pa.  Samtang dunay mga susama niining mga political ads, duna say mga hugaw nga pamaagi aron maguba ang imahe sa ilang karibal  pinaagi sa"smear campaign" o "black propaganda."

Apan duna ba gyud kaha sila’y makuhang botos pinaagi niini? Ang tubag niini, duna. Subay sa nangaging mga piniliay, sagad sa madala ug motuo sa mga ingon niini nga taktika mao kadtong mga kabus ug kadtong adunay kasagmuyo sa kasamtangang mga administrasyon.

Ang incumbent officials pirme lang gyung alaot niini nga taktika kay sila may naghupot sa renda sa gobiyerno, gamay na lang nga hulhog sa mga kaatbang ang mga naa sa posisyon na maoy dautan.

Pabor usab ang mga anaa sa oposisyon kay mahimo silang magpakaaron-ingnong buotan, dinaog-daog ug makapamili pud sila sa gusto nga mga isyu aron gamiton pagdaot sa mga kaatbang nga naa pa sa posisyon. Ang mga kabus ug kadtong wa magpakabana sa mga isyung politikal mao ang mga tawong daling manipulahon.

Aron di daling mahaylo o mailad niining mga "pakitang-tao" nga mga political ads, mas maayong mogahin og panahon ang mga botante pag-research sa backgrounds sa tanang kandidato sa nasyonal ug sa lokal          sud sa nakalabay nga napulo ka tuig.

Partikular nga angay nilang tutokan ang mga bati nila nga gipanghimo kaniadto ilabi na sa kalambigitan sa mga krimen, kurapsiyon, pagpangabuso ug uban pa. Pinaagi niini, ang matimbang-timbang sa botante kun angay ba kining suportahan. Hinumdoman unta sa katawhan, nga atol sa adlaw sa piniliay, sila maoy labing gamhanan kay naa sa ilang boto ang kaugmaon sa nasud.