Mga alibyo sa depresyon (2)

Kasumpay kini sa miagi’ng lindog mahitungod sa mga alternatibo’ng alibyo aron mawala ang depresyon. Ania pa ang dugang mga paagi;

*Music therapy – mas epektibo sab kini kay sa druga, nga haom alang sa tanang pangedaron. Magpatugtog og mahawot nga musika, kana’ng ganayon ang kahiladman ug kaisipan aron ipadpad nga iiway ang nakasamok nga negatibong panghunahuna. Ang musika, maisip nga ‘natural nga tranquilizer’ para sa atong tanlag ug tawhanon nga espirito (human spirit).

Si Phytagoras, niadto’ng ika-6 nga siglo, nga usa ka ‘philosopher/ mathematician, maoy nagmugna ini’ng ‘music therapy’. Nga sa ikaduha’ng gubat sa kalibutan, ang ospital sa beterano, nibulontaryo og pagmuntar niini nga pasilidad sa musika, alang sa ilang mga pasyente’ng samaron. Ang resulta positibo kaayo, busa nahimo na kini’ng kabahin sa pag-ayo sa mga pasyente.

Tungod ini, angay sab ni’ng buhaton ang pagpatukar sa musika sa mp3, sa headphone, kana’ng mohaom sa gusto nimo nga paminawon, nga malingaw ang isip. Kun kahinumdoman sa nangaging mga lindog nato, kadto’ng ‘Blueroom’, susama ni’g ideya sa prisohan nga daghan nasalbar nga buot maghikog tungod sa depresyon. Og nabalik ang ilang mga paglaum bisan sila mga piniriso.

Busa ayaw lugaki ang kaugalingon nga matakboyan kita’g sakit nga depresyon. Kutob sa mahimo, molakaw o makigsandurot nga malingaw ka’s paghimamatay sa mga tawo, pakigsuod sa kaila ug mga higala. Aron mag-inambita’y sa pagpaluag sa kapit-os sa panghunahuna. Sa ingon, atong mamintin ang kahimsog sa maayong kaisipan, nga dili katugkan og kasagmuyo.

Dili kita malimot nga ampingan ang kabuot nga dili mabiktima sa kahuyang sa pangisip, nga nisangpot sa depresyon, diin daghan ang nawad-an sa paglaum.