Tukma g’yud ang lakang sa kadagkoan sa Partido Liberal nga mohunong na pagtinguha nga si Senador Grace Poe maoy mahimo nga bise ni DILG Secretary Mar Roxas sa iyang pagpapili pagka presidente.
Ambisyosa kaayo kining maong senador nga bisan og ang iyang kasinatian duha pa lang ka tuig sa Senado, gusto na nga maoy modumala sa atong nasud.
Bisan og wala pa si Poe modeklarar, apan klaro na kaayo sa mga advertisement sa telebisyon nga ang labing taas nga elective post sa kagamhanan maoy iyang target.
Pastilan, kun atong padag-on si Poe pagka presidente, ang sitwasyon ikatandi nato nga misakay kita sa usa ka bus nga ang drayber nagpraktis pa sa pagmaneho’g sakyanan.
Dili mo kuyawan niana? Ipiyal ba nato ang atong nasud sa usa ka tawo nga walay kasinatian sa pagpadagan sa kagamhanan? Abi kay taas ang iyang rating sa nangagi’ng survey, nangambisyon na siya nga mag presidente? Pagka ambisyosa!
Tinuod, walay rekord sa corruption si Poe, kay duha pa man ‘sab siya ka tuig sa pagka senador. Apan ang kalinghod pa niya sa pangagamhanan maoy dako’ng rason nga dili pa siya angayan nga mahimong presidente.
Angay unta siya nga mag-bise lang usa. Sa mga Facebook comments, daghan g’yud ang wala makagusto nga si Poe mag presidente.
Apan dili nato siya mapugngan kun mao g’yud kini ang iyang ambisyon. Kita nga mga botante ang angay’ng magmatngon sa atong pagpili og pangulo sa nasud.
Sa gibalik-balik na nako, gitangtang na nako sa akong listahan si Vice President Binay tungod sa daghang mga pasangil sa kurapsyon nga wala niya tubaga.
Mura’g maisip na g’yud nga walay utok ang mga botante kun pilion nato pagka presidente ang tawo nga nagkamuritsing ang dungog sa pasangil sa kurapsyon.
Kinsa pa ang ubang mura’g magpapili? Gawas ni Mar Roxas naa pa si Davao City Mayor Rodrigo Duterte. Aw, wala man ‘sab malambigit og kurapsyon si Duterte, apan daghan lang ang nahadlok tungod sa grabe niya kaagresibo.
Nahadlok ang uban nga basin kun mahimo na nga presidente si Duterte, ang iyang mga hinanib mogara ug mao na usab ang maghawod-hawod sa atong kagamhanan.
Unya kun moreklamo ka, balhin ang imong birthday sa Nobiyembre 1. Sa Facebook, ang kumentaryo sa katawhan mao nga kay wala man sila makagusto sa kaambisyosa ni Grace Poe, adto na lang sila mosuporta kang Mar Roxas.
Ingon niini usab ang akong tan-aw. Kay si Roxas wala gayud malambigit og kurapsyon sukad-masukad ug suheto na sa pagdumala sa kagamhanan.