Sipyat ang INC

Bisan pa sa paglurang sa dakong protesta sa mga sakop sa Iglesia ni Cristo batok sa ilang giingon nga pagpanghilabot sa kagamhanan sa kalihokan sa ilang simbahan, magpadayon gayud ang imbestigasyon sa Department of Justice sa kaso nga gipasaka batok sa mga opisyales sa INC.

Matud ni DOJ Secretary Leila de Lima, ang kaso mag-agi gihapon sa normal nga proseso sama sa ubang kaso nga gisang-at ngadto sa maong departamento. Aduna kunoy prosecutor nga i-assign sa maong reklamo alang sa pasiunang pakisusi.

Sa niaging mga semana, usa ka pastor sa INC ang mipasaka didto sa DOJ og kasong illegal detention, coercion ug harassment batok sa pamunoan sa maong relihiyon. Tuod man, milihok dayon ang maong departamento.

Apan mirebenta ang kadagkoan sa INC. Ilang gialegar nga, gumikan sa maong pakisusi sa DOJ, nanghilabot na ang estado sa kalihokan sa ilang simbahan. Ug miulbo dayon ang dakong protesta didto sa kaulohan nga grabeng mipalyar sa dagan sa trapiko.

Hinuon katungod sa maong relihiyosong grupo ang paglusad sa maong protesta. Ania kita sa usa ka demokratiko nga nasud diin sagrado nga gigarantiya ang katungod sa katawhan pagpahungaw sa ilang mga kasagmuyo sa kagamhanan.

Apan, sa laing bahin, sipyat usab ang INC sa baruganan niini nga dili makapanghilabot ang estado sa gubot nga mitay-og karon sa liderato niini. Kini tungod sa kriminal nga aspeto sa maong kaguliyang.

Tungod kay aduna may kasong kriminal nga gisang-at, dili gayud kini palabyon sa kagamhanan bisan pa man kun mga haligi sa usa ka dako ug inpluwensiyado nga religious organization sama sa INC ang nalambigit.

Basin nga nagtuo ang INC nga sa ka dako ug kainpluwensiyado niini, walay katungod nga manghilabot ang kagamhanan sa kaguliyang nga mitay-og karon sa liderato niini. Apan simbako kun adunay nangamatay sa maong gubot, igo na lamang ba nga mamilok sa ilang mga mata ang atong otoridad?

Balido ang reklamo sa maong pastor ug angay lamang nga mohimo ang DOJ og pakisusi. Ug walay mahimo ang INC niini. Kinahanglan nga mokooperar ug mopailalum sa imbestigasyon kadtong mga opisyal niini nga nalambigit sa kaso isip paghimo sa ilang kaugalingon nga ehemplo sa ilang mga sumusunod.