Police visibility sa APEC

Nangangkon ang kapolisan nga nimenos ang kriminalidad sa Sugbo sukad gisugdan ang mga tigum sa Asia-Pacific Economic Cooperation (APEC).

Matud ni Sr. Supt. Rey Lyndon Lawas, ang hepe sa regional directorial staff sa Police Regional Office-7, nikunhod og tres porsiyento ang non-index crimes ug 14 porsiyento sa index crimes.

Sa mga “non-index crime” nagpasabot kini og "victimless crimes" kon mga salaod nga wala’y biktima mismo nga moreklamo ngadto sa kapolisan.

Kini sama pananglit sa ilegal nga drugas ug ilegal nga sugal. Samtang ang “index crimes” mao kadtong mga salaod nga gilatid diha sa Revised Penal Code (RPC) sama sa patay, kawat, tulis, snatching ug uban pa nga adunay mga biktima nga moreklamo ngadto sa kapolisan.

Sa laktud nga pagkasulti, gitawag og index crimes ang mga “crimes against persons and properties.” Sa mga non-index crimes kun nakamatikod mo, nimenos sa pagpahigayon na sa mga kalihukan sa APEC ang mga dakop ug operasyon sa kapolisan batok sa ilegal nga drugas. Kini tungod kay kadaghanan sa mga polis sa nagkalain-laing units gikuha ug gidestino aron mobantay sa mga rota ug mga venue sa mga tigum sa APEC.

May mga polis pa gikan sa ubang mga probinsya sa Central Visayas nga gidugang ug gipaanhi sa Sugbo aron makatabang sa seguridad sa mga delegado sa APEC.

Busa dili sama sa nangagi nga mga buwan sa wala pa ang APEC nga sagunson ang dakop, buy bust operation ug pagpangronda batok sa negosyo sa ilegal nga drugas. Siguro nihatag og konsiderasyon ang kadagkoan sa kapolisan ngadto sa ilang mga sakop sa quota sa pagpangronda batok ilegal nga drugas tungod sa APEC.

Hinoon sa pagsugod sa kalihukan sa APEC may mga pagpanakop gihapon nga gihimo ang kapolisan. Niadtong Biyernes usa ka 75 anyos nga lola nga taga Bolinawan, Carcar City, Cebu ang gisikop sa pagpamaligya og ilegal nga drugas.

Nakasakmit usab ang kapolisan sa dakbayan sa Lapu-Lapu og dul-an P2.5 milyones nga kantidad sa shabu ug mga armas niadtong Huwebes sa gabii.

Samtang wala hingpit mabiyai sa kapolisan ang paggukod sa negosyo sa ilegal nga drugas, ako manghinaot nga dili kini lugakan bisan pa sa kakuwang sa personnel tungod kay nakatutok ang kadaghanan kanila sa mga kalihukan sa APEC.

Kuyaw nga magpista ang mga drug pusher ug drug dealers sa pagpamaligya ug pagpalusot sa ilegal nga drugas tungod kay wala’y nagbantay kanila. Sama sa panultihon nga "when the cat is away, the mice will play."

Sa index crimes, makaginhawa siguro ang publiko og gamay gikan sa pagpamatay sa mga "riding in tandem," ug makakompiyansa ang mga pasahero sa mga PUJ gikan sa mga tulisan, gikan sa hulog piso gang ug sa mas dagko pa nga hulga gikan sa mga terorista tungod sa police visibility.

Samtang ato unya nga ikapasigarbo ang kahapsay ug kalinaw sa kinatibuk-an unya nga kalihukan sa APEC, mas nindot tagamtamon ang hingpit nga kalampusan nga molangkob sa pagkapuhag sa mas dagko nga sindikato sama sa illegal nga drugas, naa may APEC o wala.