Mura’g manok nikakak!

Wala lang gibahaan, kun dili gilunopan g’yud sa pagsaway gikan sa mga netizens ug halos sa tanang sektor, wala’y labot ang mga politiko nga misakay sa isyu mahitungod sa random inspection sa Bureau of Customs sa mga Balikbayan boxes.

Apan ang "kapalmuks" ni BOC Commissioner Alberto Lina wala g’yud matarog sa mga pagsaway hangtud nga ang iyang Big Bossing na ang mipahunong sa dako’ng pagdaugdaug nila sa mga OFW kinsa giisip nga moderno nga bayani sa nasud.

Kun dili pa lang tungod kay nagkaduol na ang eleksyon, ambot kaha og sama sa manok mokakak ba ang Malacañang ug manginlabot sa isyu?

Wala man gani niini pugngi ang Bureau of Internal Revenue (BIR) sa pag-apil sa pagkolekta sa buhis bisan kadtong mga gagmay’ng nanginabuhi aron mapuno ang panudlanan sa kagamhanan.

Mahulog sa wala’y pulos ang kakugi ni Presidente Aquino sa pagbaligya sa iyang manok nga si DILG Secretary Mar Roxas ug ubang sakop sa Liberal Party kun wala niya pakganga ang tinonto sa BOC kinsa mipakagamay sa mga OFW.

Tungod kay nagkataas na man ang hilanat sa eleksyon, ang makatilaw sa panimalos sa mga nangasuko nga katawhan mao ang mga manok ni Presidente Aquino.

Apan bisan pa man kun "the damage has been done" mahimo pa nga makabawi ang kampo sa Liberal gikan sa kaaligutgot sa mga OFW kauban ang mga misimpatiya kanila kun hingpit nga taktakon sa katungdanan ang giisip nga berdugo sa mga balikbayan boxes sa mga OFW.