EDITORYAL – Mga ‘Scrap’ sa CCMC

Mitumaw na usab pagbalik ang isyu kun hain mapunta ug kinsa ang nakakuwarta sa halin sa mga scrap materials gikan sa giguba nga Cebu City Medical Center.

Masabot kaayo nga gibalik paglab-as kini nga isyu sa pamasin nga madaot si Konsehal Mary Ann delos Santos kay siya man kaniadto ang pangulo sa Hospital Management Committee.

Klaro kaayo tungod kay ang tinguha nga ipa-imbestigar ang isyu gikan man sa konsehal nga alyado sa Team Rama ug gihimo kini human si Delos Santos nakig-alyado na sa Bando Osmeña Pundok-Kauswagan (BOPK).

Ang Cebu City Council nakahimo na og resolution kaniadtong buwan sa Desiyembre nga nag-awhag og imbestigasyon sa mao nga isyu. Mas nindot kun si Mayor Michael Rama maoy magpasiugda og pakisusi niining mao nga isyu.

Dili kalikayan nga magduda ang katawhan nga gitapin-an ra niya kining mao nga isyu kay mahadlok siya nga kun molutaw ang kamatuoran basin og adunay iyang mga suod nga maigo.

Tungod sa kadako sa building sa CCMC nga giguba, ang mga scrap materials sama sa kabilya ug ubang puthaw ug mga butang nga mabaligya pa magkantidad usab og milyon-milyon ka pesos.

Walay angay’ng kahadlokan si Mayor Rama kun wala man siya’y labot sa pagkahanaw sa mga scrap materials sa CCMC. Kun dili sulbaron ni Mayor Rama kining mao nga isyu, sigurado nga usa kini sa mga isyu nga gamiton sa iyang mga kontra atol sa eleksyon.

Mahisama unya si Rama kang Vice President Binay nga wala gayud magpakabana pagtubag sa mga isyu sa pangurakot nga gipasangil kaniya kaniadto mao nga karon daghan ang dili na ganahan kaniya.