Ang pagpapiyansa ni Enrile

Daghang kilay ang niiknat sa desisyon sa Korte Suprema sa boto nga 8-4 pagtugot nga makapiyansa ang 91 anyos nga si Juan Ponce Enrile alang sa iyang temporaryo nga kagawasan sa mga kaso nga plunder ug graft nga iyang giatubang sa Sandiganbayan.

Base sa Article III, Section 13 sa atong Batakang Balaod (Bill of Rights), bisan kinsa nga akusado, gawas lang niadtong nag-atubang og kaso nga ang silot Reclusion Perpetua unya lig-on ang ebidensya, kinahanglan nga sa dili pa mapamatud-an nga sad-an o makonbikto, mahatagan sa iyang temporaryo nga kagawasan pinaagi sa pagpiyansa.

Ang kaso nga Plunder nga giatubang ni Senador Juan Ponce Enrile usa ka heinous crime nga wala gitugot sa balaod nga kabutangan og piyansa.

Apan mahimo nga makapiyansa ang usa ka akusado bisan kun heinous crime ang iyang giatubang kun mapakyas ang prosekusyon sa pagpresentar og lig-ong mga ebidensya sa kaso batok niya didto sa korte aron mapugngan ang paghatag sa iyang temporaryong kagawasan.

Ngano nga daghang kilay ang niiknat sa pagtugot sa Korte Suprema nga makapiyansa si Senador Enrile? Ang desisyon sa walo ka mahistrado nga nitugot ni Enrile sa pagpiyansa nakapatumaw sa mga pagduda nga ilang gihatagan og espesyal nga pagtagad ang senador.

Ilang gihimo nga rason mao ang "humanitarian consideration," ang kondisyon sa iyang panglawas nga daghan na og sakit ug ang iyang pangedaron.

Apan si Justice Marvic Leonen sa iyang dissenting opinion nikwestyon niini, kay una sa tanan, wala kini gamita nga rason sa mga abogado ni Enrile sa ilang gipasaka nga petisyon ngadto sa Sandiganbayan. Mga punto legal ang ilang gipahimug-atan.

Kun sabton ang punto ni Justice Leonen gihatagan sa walo ka mahestrado si Enrile sa iyang temporaryo nga kagawasan sa wala’y igong basehanan.

Sa maong desisyon, daghan na karon ang nabalaka nga gamiton kini nga basehanan sa daghang akusado nga nag-atubang og bug-at nga mga salaod aron mahatagan sa ilang temporaryo nga kagawasan.

Naka-hospital arrest pa sila si kanhi presidente Gloria Macapagal Arroyo nga daghan na usab og gipamati sa lawas, si pork barrel scam queen Janet Lim-Napoles, si Senador Jinggoy Estrada ug Senador Bong Revilla.

Basin kun pipila ka adlaw makabalita nalang usab kita nga gitug’tan na sa Korte Suprema nga sila makapiyansa.

Sa "humanitarian consideration" kun atong sabton, naluoy ang walo ka mahistrado sa kahimtang ni Enrile kay tiguwang na siya ug masakiton.

Apan nasayod ba kaha sila nga lagsik pa nga makabiyahe si Enrile sa pagsuroy sa bisan asa nga dapit sa nasud?

Gani, gihugon-hugon man ug dunay imbitasyon nga pakuyogon si Enrile ni Vice President Binay sa iyang pagbisita sa Sugbo kagahapon.