Mga benepisyo sa mangosteen (2)

 Ang ulahing benepisyo nga nahisgutan sa miagi'ng lindog nato mao kadto'ng mahitungod sa sirkulasyon sa dugo, ania atong ipadayon ang pagtuki niini.

*Pagsirkular sa dugo — Kun maayong sirkulasyon sa atong dugo, hingpit makatrabaho ang katibuk-an nga mohimsog ang panglawas. Makatabang sab kini nga malikayan ang anemia. Makaproteher kini sa 'cataract', nga ang pagtumar ini'g capsula 1000 mg kada adlaw matud pa, makapatin-aw kini sa mata.

*Makapamenus sa kolesterol — Ilabi na sa 'bad cholesterol'. Balansehon niini ang normal nga lebel sa kolesterol sa lawas. Aron sab makatarung sa trabaho ang kasingkasing nga mopahupay sa pag-antos sa panakit sa dughan.

*Tuberculosis — Sakit nga TB kini, nga ang mangosteen makatabang niini kay nagbaton ni'g 'anti-bacterial' ug 'anti-fungal', nga may mopaalibyo sa tuberkulosis. Gawas pa, epektibo makapalig-on sab ni sa sistima sa imyun.

*Kanser — Ang mga antioxidants nga mabatonan sa mangosteen, makatabang sa pagsanta sa kanser. Ang iyang kaepektibo sa pagprotehir gikan sa 'free radikals, nga maoy nakapaluya o nakapa-stress sa mga selyula.

Sa laktud, ang pagkaon o pagtumar sa mangosteen, gikinahanglan kini aron sa kanunay balanse ang pagkaon nato sa  pabusog (macronutrients) ug tugob sa mga sustansya (micronutrients), aron di kita dali matandog sa mabug-at nga balatian o mga sakit, ilabi na karo'ng panahona nga gipalibotan kita'g grabe'ng pwerhisyo sa toksik nga hangin, polusyon ug radyesyon sa atong espasiyo.

Busa magseryoso kita nga iprayoridad ang kahimsog sa panglawas, di kay unya na lang kung mahasol na's grabe'ng sakit. Bisa'g nasayud kita nga kini makaayo apan ang kaepektibo niini nag-agad sa disiplina, sa pagpakabana nga makabaton kita og aktibo ug mabaskugon nga panglawas.