Dear Atty. Divine,
Usa ako ka guwardiya sa banko. Matag buwan ang among agency mo-deduct sa among suweldo alang sa SSS, PhilHealth ug PagIBIG sukad pa niadtong 2011. Karong bag-o, miadto ko sa SSS aron unta sa pag-file og loan, apan nakurat na lang ko kay ang akong total contribution wa man gani makaabot og usa ka tuig. Buot ipasabot nga ang among agency nagsige lang og deduct sa akong suweldo alang sa SSS apan wa diay nila i-remit. Asa man nako ni ireklamo ang akong agency aron ilang ma-remit sa SSS ang ilang gi-deduct sa akong suweldo? Kun ugaling akong masuta nga wa sab nila i-remit ang akong contribution sa PhilHealth ug Pagibig, unsa may maayo nako nga buhaton? — Gerry
Dear Gerry,
Ang imong buhaton mao ang pagpasaka og reklamo batok sa imong agency ngadto mismo sa Social Security System. Dad-a ang imong mga payslip nga nagpamatuod nga ilang giibanan ang imong suweldo og SSS contribution kay kini ang mopamatuod nga wa nila gi-remit ang imong contribution. Base sa balaod kun mapamatud-an nga wa i-remit sa imong agency ang contribution sa ilang kawani then mahimo sila nga mabilanggo ug makamulta pa g’yud ang employer. Gawas niini, obligado pa g’yud ang imong employer sa pag-remit sa imong total contribution sud sa pipila ka tuig nimo nga pagtrabaho. Kun imong masuta nga wa’ sab nila i-remit ang imong contribution sa PhilHealth ug Pagibig, imo gihapong pasakaan og reklamo ang imong employer ngadto sa Philhealth ug sa Pagibig mismo. -Atty. Divine
Alang sa inyong pangutana may kalabutan sa problema’ng legal ipadala lang sa Legal Corner sa Banat News sa V. Gullas St., Cebu City, or email sa flores_divina@yahoo.com ug akong tubagon ang inyong pangutana pinaagi sa akong column mata’g Miyerkules ug Domingo.