Dalaygon ang gihimo ni kanhi kongresista Tomas R. Osmeña nga pagpasiugda niya og Farmer’s Market diha sa entrada nga bahin sa SRP habig sa Barangay Mambaling.
Tungod sa iyang gihimo nga pagpasiugda og merkado sa mga produkto sa kaumahan, mahalin sa tumang kasayon ang mga abut sa mga mag-uuma ug ang katawhan makapamalit og barato nga baligya.
Gituyo ni Osmeña nga ang mga mag-uuma mismo maoy pabaligyaon sa ilang mga produkto, dili sama sa merkado sa Carbon nga komprahon ang mga baligya sa mga wholesaler nga mopaganansya na sa presyo.
Sa gihimo ni Osmeña daghan ang nangalipay kay barato g’yud ang kantidad sa mga baligya nga ilang mapalit sa Farmer’s Market sa Mambaling.
Si Mayor Michael Rama mipalambo usab sa “Tugbong,” susama sa Farmer’s Market diha sa Plaza Sugbo atubangan sa City Hall, apan daghan sa mga tindera diha ang mipahimulos na sa higayon.
Gitandi pa sa ubang tindera ang ilang presyo diha sa Tugbong mas barato kuno kay sa kantidad didto sa Carbon, apan nabantayan nga dili tinuod ang ilang pagkumparar sa presyo.
Tungod sa politika, naglumba karon sila si Osmeña ug Rama sa paghimo og mga proyekto nga kapahimuslan sa katawhan. Gani si Osmeña nagplano nga sunod niya’ng himuon mao ang paghimo og merkado alang sa mga livestock products.
Kini aron nga mobarato na usab ang presyo ug ang kinabag-ang katawhan mao gihapon ang makabenepisyo.
Ang presyo sa bugas lisud na hinuon kini nga mapakubsan kay ang ganansya sa mga tigbaligya niini gamay ra g’yud kaayo gawas lang niadtong mga tikasan nga tindera.