EDITORYAL - Maayo lang sa primero

Gipanghipos na sa siyudad sa Sugbo ang mga libudsuroy sa kadalanan. Aksyon nga giisip sa simbahan nga hustong lakang tungod kay alang kini sa ilang kaayohan.

Ang pagpanghipos niini giangkon daan sa siyudad nga may kalambigitan sa umaabot nga kalihokan sa Asia Pacific Economic Cooperation sa Agosto 22 ning tuiga ug sa umaabot nga International Eucharistic Congress sa 2016.

Tungod niini, mahawan-hawanan g’yud og gamay gikan niining mga nagsamok-samok sa dalan ang siyudad, apan ang pangutana, hangtud kanus-a kaha kini kutob?

Nahimo na ra ba nga kinaiya sa siyudad nga maayo lang sa primero apan di na molahutay ini og kadugayan. Kini maong kampanya kontra libudsuroy dili molahutay kay wala man g’yud kini hustong sistema ug tumong.

Kung duna man silay gihimong aksyon, mabaw ra kaayo kay ini og human sa pipila ka adlaw, pasagdan na man usab pagbalik kining mga maglibudsuroy nga magpasad diha sa kadalanan.

Ang paghipos gihimo lang aron nindot tan-awon ang kadalanan. Di nila gusto angkunong  buot nilang tagoon sa mga mata sa delegado nga dunay mga tawong walay pinuy-anan nga namuyo lang sa aseras.

Wala may klarong pasilidad nga molahutay pag-atiman kanila ang siyudad. Kung duna man, pirme lang temporaryo. Kanang “Balik Probinsya” nga programa sa siyudad maayo lang usab na kutob sa paghatud, pagkahuman wala na. Maong paglabay sa pipila ka adlaw, mamalik na usab sila dinhi.

Kini untang social services sa siyudad sa Sugbo moseryuso g’yud sa ilang kampanya batok sa mga libudsuroy pinaagi sa paghatag kanila og panginabuhian, kapuy-an bisan og hulog-hulogan, ug uban pang gikinahanglan aron sila mamahimong may kapuslanan sa katilingban.