Duna na say nalanag nga mga bata gikan sa usa ka tunghaan tungod sa napalit nilang pagkaon, apan ning tungora, diha g’yud mismo sa ilang tunghaan.
Usa kini ka leksyon dili lang sa mga tagdumala sa eskuylahan, mga ginikanan kondili hasta sa mga lokal nga mga tinugyanan sa maayong panglawas nga wala magtarong sa ilang trabaho.
Leksyon kini sa DepEd tungod kay nakwestyon karon kun unsa ka seryoso ang ilang kampanya nga kadto lamang mga sustansyadong pagkaon maoy angay ibaligya sa mga kantina sa mga tunghaan.
Gani usa sa ilang panawagan ngadto sa mga ginikanan ug sa mga bata nga dili na sila papaliton og mga pagkaon sa gawas sa ilang tunghaan ug adto na lang sa ilang mga kantina.
Kun buot tan-awon, murag gi-monopoliya sa mga magtutudlo ang pagpamaligya og pagkaon sud sa eskuylahan niining paagiha.
Daw gihimong pasumangil nga dili luwas ang mga pagkaon nga mapalit sa gawas sa eskuylahan, mao nga bisan kadtong mga ginikanan nga way panahon pag-andam og snacks sa ilang mga anak mopahimangno kanunay sa ilang mga anak nga sa kantina lang g’yud mopalit og pagkaon kay mao man kini ang pasalig sa DepEd.
Apan sa nahitabo sa Hipodromo Elementary School sa Cebu City diin onse nila ka tinun-an ang nakapalit ug nikaon sa baligya gikan sa ilang kantina, sigurado pa bang luwas ang tanang gibaligya sa maong tindahan?
Unsa man g’yuy kasigurohan nga luwas g’yud ang tanang gibaligya sud sa mga kantina? Bahala na lang kun kinsa ang nagbaligya niini basta siguro lang g’yud nga luwas, limpyo ug sustansyado ang pagkaon.
Niining puntoha mosud ang lokal nga mga tinugyanan sa panglawas, sama sa mga sanitary inspectors ug nutritionists nga angay untang magsige og libot sa mga eskuylahan aron pagtan-aw sa mga gipamaligya sa mga kantina.