Tinago e-trikes

Nindot g’yud ning barangay kapitan nga adunay imagination ug mogamit niini alang sa kaayohan sa barangay. Sa ato pa, adunay mga panglantaw ug initiative nga makaayo sa barangay.

Mao kini ang nahitabo ni Kapitan Joel Garganera sa Barangay Tinago ning dakbayan nga nakakita og daghan kaayohan alang sa barangay sa iyang paggamit sa mga electric tricycles.

Matud niya nga ang maong mga e-trikes gamiton pagkolekta sa basura ug alang sa pagpatuman sa balaod batok sa kriminalidad.

Ang Tinago maoy una nga barangay sa tibuok lalawigan sa Sugbo, o sa tibuok region 7, nga migamit og e-trikes nga daghan kaayo’ng mga advantages over the motorized tricycles:

• Cost savings

• Environment-friendly kay walay pollution

• Gipadagan sa bateriya nga rechargeable

• Di mogamit og gasolina o krudo

• Dili saba

• Tungod sa kagamay, makalusot-lusot sa gagmay’ng mga dalan.

Amo ni nga gi-introduce sa dakbayan sa Lapu-Lapu, mga six months ago, apan wala sila makombinser sa pagkakinahanglanon niini.

Wala sila makakita sa mga bintaha nga nakita ni Kapitan Garganera. Ideal unta kaayo ni didto sa Olango Island.

Ang mga e-trikes gigamit na karon sa mga dagku’ng campuses sa University of the Philippines; De La Salle University – Dasmariñas sa Cavite; ug sa Ateneo de Manila University sa Diliman.

Ang mga e-trikes maoy gisakyan sa mga delegado, mga trade ministers, ug mga senior officials sa APEC (Asia Pacific Economic Cooperation) sa tigum nga gihimo didto sa Boracay. Ug maoy ilang gisakaysakayan sa tibuok isla.

Matud pa, natingala sila nga ang maong mga e-trikes gama ra sa Pilipinas. Gani ang among gi-introduce sa Lapu-Lapu City, diha gihimo sa lungsod sa Consolacion, Sugbo, apan ang tanang parts made in Japan.

Ang inauguration sa assembly plant sa mga electric tricycles sa Carmona, Cavite, gitambongan nila ni Undersecretary Prudencio Reyes, Jr. sa DTI, ug LTO Executive Director Giovanni Gonzales.

Duna say mga e-jeepneys, made in the Philippines, karon nagdagan sa Makati, Ateneo, ug sa Filinvest City sa Muntinlupa City.

Sila si Senador Bam Aquino, Ralph Recto ug Antonio Trillanes mi-file sa Alternative Fuel Vehicles (AFV) bill, ug susamang version ang gi-file usab sa House nila ni Representatives Rufus Rodriguez, Abigail Binay, Rodulfo Biazon, ug Mark Villar.

Ug sa Mandaluyong City, misulay si Mayor Benjamin Abalos, pag-charge sa e-trike battery, ginamit ang bag-ong charging system nga gi-develop sa UP Electrical & Electronics Engineering Institute.

Na-fully charged ang e-trike in less than 30 minutes. So, there you are.