‘Swing operations’ sa Cebu Customs

Nagkagrabe na ang dinaotay sa mga politiko, wala pa gani ang campaign period. Wala ko ganahi niining nanggawas nga mga artikulo nga nagpasangil nga si Senador Grace Poe usa ka palahubog ug baho’g baba nga daw imbornal tungod sa pagka-chain smoker.

Kinsa kaha ang mapasanginlan niining giingon ni Manila Mayor Joseph Estrada nga ‘black propaganda’ batok sa anak sa iyang higala?

Nahinumdom ko nga ang kampo ni Bise Presidente Jejomar Binay maoy mikuwestiyon sa “residency requirement” ni Poe. Gani, may misang-at og kaso batok ni Poe sa Senate Electoral Tribunal aron ipatangtang siya isip miyembro sa Senado.

Tungod sa bangi ni Binay sa kampo ni Poe, seguro ko nga nawad-an na kini og paglaum nga makuha kini isip iyang bise presidente sa 2016. Ang Liberal Party ni Mar Roxas wala’y puas pagpanguyab kang Poe, bisan sa mga isyu.

Si Senador Bongbong Marcos na usab ang gihaylo sa kampo ni Binay aron iyang i-tandem. Mosugot kaha ang mga Marcos nga maduhig si Bongbong sa rekord ni Binay sa kurapsyon?

* * *

Nagmata ra g’yud diay kita’g buntag. Grabe man diay ang kinawatay sa mga container vans nga adunay kargamento gikan sa Cebu International Port niadtong Hunyo 17.

Nagkagubot ang Bureau of Customs-Port of Cebu niadtong miaging semana human mabunggo didto sa BOC-Manila ang giingong kawat sa kapin 20 ka container vans nga may sulod nga mga nagkadaiyang importasyon pinaagi sa giingon nilang “swing operations” sa CIP.

Gitawag kini og swing operations kay inay mo-file og import entry sa Entry Processing Unit sa BOC-Cebu, gideretso kini og pagawas gikan sa CIP pinaagi sa pagpresentar og peke nga mga papeles sa mga kawani sa Customs nga nagbantay sa ganghaan sa Customs zone. Giingong usa ka licensed Customs broker nga naila sa ngalang “Rodel” ang gipaubos karon sa imbestigasyon sa mga tinugyanan sa Customs tungod kay gisuspetsahan siya nga nalambigit sa “swing operations.” Kun kinsa kini si Rodel, atong sulayan sa pag-ila.

Usa ka kawani sa Port Operations Division ang gikuwestiyon usab karon tungod sa giingong pagpakigkunsabo sa mga swing operators.

Nagduda ko nga adunay tag-as nga opisyal nga nalambigit niining kinawatay sa mga kargamento sa Customs. Apan kana lang kawani sa POD nga labing mubo og posisyon ang giplanohang iduot kun magka-kaso na.

Kun ako ang nahimutang nianang kawani sa POD, mo-execute ko og affidavit aron itudlo kinsa ang tag-as nga opisyal nga nagsugo o nagpugos kaniya pagpagawas sa mga kargamento’ng wala bayri ang buhis. Apan akong pangutana ngano nga nakalusot man kining swing operations karon nga estrikto ang BOC?

Dili g’yud ko motuo nga mahitabo kining swing operations kun wala’y bendisyon sa mga dagko nga opisyal sa Customs.