Duha ka semana na lang sa di pa magsugod ang mga tigom sa Asia Pacific Economic Conference (APEC) sa Sugbo maong labihan nang lingaha sa atong lokal nga mga opisyal sa paghingpit sa mga pangandam aron pagsegurong hapsay ug malampuson ang tibuok kalihokan. Kapin sa gatos ka tigom ang gitakdang ipahigayon dinhi sa ato nga gipanghinaot nga makapalambo sa patigayon uban sa kanasuran sa Asya ug Pasipiko.
Maong nag-eksperimento na og usab sa ruta sa mga sakyanan ang Dakbayan sa Mandaue ug gi-apura nang Cebu City Mayor Mike Rama paghawan sa John Paul II Avenue (kanhi Juan Luna Ave. ug kanhi San Jose dela Montana). Nagplano na ganing Cebu City Hall paghipos sa mga makililimos.
* * *
Dihang nikuyog si Ferdinand Manus sa DYAB Radyo Patrol sa mga kawani sa Mandaue City Hall pagpanlimpiyo sa kadalanan nga maagian sa mga delegado sa APEC, nalingian nila ang daghang tipaka sa nangabuak nga tiles sa tugkaran sa Cebu International Convention Center (CICC).
Nagkauyon ang mga kawani nga di lang una hipuson ang mga tipaka. Mangunsulta una ang ilang kadagkoan nilang Mayor Jonas Cortes ug ni Gobernador Junjun Davide kun ibalik ba pagtapak o hingpit na lang nga ibasura ang mga tipaka. Nabalaka hinuon kong daghan ang nagpanlingo uban nila sa gidangatan sa istruktura nga gigastohan og usa ka bilyon ka pesos sa buhis sa mga Sugbuanon.
* * *
Kun nabalaka ang lokal nga mga opisyal nga makit-an sa mga delegado ang huot nga trapiko, mga basura ug makililimos, segurong makadapit sa pagtagad sa taga APEC ang nagbuntaog nga building nga hingpit nang naggusbat di lang tungod sa linog ug bagyo kun dili, ug labi na gyod, sa kataphaw sa mga sangkap nga gigamit ug paturagas nga trabaho.
Unsaon man pagtubag sa lokal nga mga opisyal ang di kapugngan nga mga pangutana sa mga delegado? Tug-anan ba nila sa tinuod nga may mga ebidensiya nang gipresentar sa Ombudsman sa posibleng overpricing? Mokumpisal ba nga higanteng sayop ang pagtukod ini?
* * *
Mangahas ko pagsugyot nga magbutang silang Davide ug Cortes og dakong karatula sa ganghaan sa CICC nga bantang sa agianan sa mga delegado nga magkanayon: “THIS IS HOW NOT TO BUILD AN INTERNATIONAL CONVENTION CENTER.”
Sa ingon, mas sayon na lang ang pagpasabot sa atong mga bisita nga:
Wa kinahanglanang CICC kay dunay mas haom ug mas andam nga kapahigayonan sa 12th ASEAN Summit niadtong 2007;
Usik ang paggamit og usa ka bilyon ka pesos nga siningtan sa mga Sugbuanon sa proyekto nga kagastohan unta sa nasudnong gobiyerno; ug
Dakong sayop ang pagtukod og convention center nga mao rang usa nga nagtuhoy, o sa kaso sa CICC nagyaka, layo sa hotels ug ubang kinahanglang adtoan sa mga delegado.