Sinabtanay lang

Naabtan nako kaniadtong Martes ang mga ginikanan sa ganghaan sa Cebu City Central School nga puno sa kabalaka ug kadaghanan nagtagawtaw tungod sa kahimtang sa ilang mga anak nga diha lang ilawom sa tulda nagpahigayon sa ilang klase.

Kini tungod kay gigamit ang ilang mga classrooms isip temporary shelter sa mga nabiktima sa sunog sa Sitio Kabulihan, sakop sa Barangay Sambag 1.

Diha nga akong gisulod, ako mismo nakaingon nga adunay basehan ang kahingawa sa mga ginikanan sanglit mga grade one ug grade two pupils ang mao nga mga tinun-an. Kapin sa 600 ka “tsikiting” ang nag-antos sa kainit tungod kay tent ra man ang salimbong sa adlaw nunot sa pagpagamit sa mga nasunogan sa 14 ka lawak saringan.

Nakasabot ang mga ginikanan sa kahimtang sa mga fire victims ug dili sila supak nga gamiton nga evacuation center ang mga classrooms, apan panahon sa buntag gamiton kini sa mga bata sa ilang klase ug mobanos lang ang mga nasunogan ini’g pamuhi sa mga tinun-an.

Win-win solution. Sa adlaw ang mga biktima sa sunog sa tent lang una mopahiluna, samtang nagklase ang mga bata.

Hinuon aron dili mabulad sa init sa adlaw gipabalhin na sa laing mga classrooms ang mga bata apan shifting ang ilang klase. Dunay pang buntag ug panghapon, apan kadtong sa morning session kinahanglang mosayo og mata ang mga bata kay alas 6 sa buntag magsugod na ang klase.

Ang opisyal sa DSWS nangayo og pagsabot sa mga ginikanan kay temporaryo ra man ang pag-estar sa mga fire victims sa eskwelahan. Apan dili ‘sab ko kabasol sa usa ka ginikanan nga mipadayag nga ang kahimtang sa ilang mga anak walay kalainan sa mga nasunogan gumikan sa kahasol nga ilang nasinati.

Hasol man tuod sa mga tinun-an apan gikinahanglan sabton pud nato ang sitwasyon kay kun ang mga fire victims ang pagbut-on, dili sila mopuyo og evacuation center apan wala lang sila’y kapilian.