Daghan na kaayo ang nahasol sa grabe kahuot nga trapiko sa dakbayan sa Mandaue.
Ang kaniadto 10 ngadto sa12 kilometros nga biyahe gikan sa dakbayan sa Mandaue ngadto sa dakbayan sa Sugbo makuha ra unta og 30 minutos, apan karon moabot na og dul-an duha ka oras.
Niadtong Biyernes lang, ang akong biyahe gikan sa ABS-CBN station sa Barangay Jagobiao paingon sa dakbayan sa Sugbo niabot og dul-an usa ka oras og tunga.
Sugod sa Barangay Basak hangtud na sa tiilan sa Maguikay fly-over panagsa nalang moirog ang mga sakyanan. Duol kaayo ang maong distansya.
Mokapin lang kini sa duha ka kilometro. Apan nilanat og dul-an usa ka oras ang pagkatanggong sa mga sakyanan. Sulod sa taxi, nagduwa sa akong huna-huna nga manaog ug molakaw nalang.
Ang duha ka kilometro kun lak’won siguro molungtad lang og 25 minutos. Naka-heels lang ko og sapatos niadtong higayona.
Ang kinatibuk-ang north road gikan sa Barangay Jagobiao hangtud na sa tiilan sa Maguikay fly-over niadtong Biyernes napuno sa mga sakyanan.
Usa sa mga nikaon sa daku’ng bahin sa karsada mao ang naglumbay nga dagku’ng trucks. Gikan sa Barangay Basak hangtud sa eskina Barangay Tabok nga dili makasibog ang mga sakyanan.
Ang dagku’ng trucks gikan sa dakbayan sa Mandaue nga mo demano pasulod sa Barangay Tabok dili makadali-dali sa pagliwag sa eskina.
Samtang ang mga sakyanan nga padulong sa amihanang Sugbo dili dayon makalusot tungod kay matanggong sa unahan sa simbahan sa Fatima Basak tungod sa gikawot nga drainage.
Unya ang mga sakyanan gikan sa eskina sa Barangay Tabok padulong sa tiilan sa Butuanon Bridge matanggong og dugay tungod sa taas nga oras nga gigahin alang sa Go ug Stop signal sa traffic lights sa intersection sa taytayan.
Ang laing nakapaet sa kahuot sa trapiko sa Mandaue City mao ang pagbalibad sa ubang taxi drivers sa mga pasahero padulong sa amihanang Sugbo tungod sa traffic.
Kun mopasakay man gani, mangayo ang uban og patong tungod kay maalkanse sila sa biyahe.
Hangtud kanus-a mahuman ang kalbaryo sa trapiko sa dakbayan sa Mandaue? Ang 60 ka adlaw nga eksperimento sa One Way traffic scheme sa dakbayan sa Mandaue gituyo ra usab tungod sa pagpahigayon sa APEC meetings sugod sa Agosto 24.
Maayo unta og dili masumaran sa pagtrabaho ang gidungan pagguba nga kadalanan sa dakbayan sa Mandaue aron mahatagan sa alibyo ang taudtaod na nga kalbaryo sa traffic!