Pagpangandam sa APEC

Usa ka daku’ng kalihokan ang ipahigayon dinhi sa Metro Cebu karong buwana sanglit kita man ang mo-host sa Asia Pacific Economic Cooperation (APEC) summit.

Tambongan kini sa mga lider sa nagkalainlaing nasud diin magtagbo sila dinhi sa Sugbo alang sa maong economic conference.

Dako ang panginahanglan sa kaluwasan ug seguridad sa maong mga heads of states ug maoy rason nga halos tanang ahensiya sa gobiyerno subsob ang pagpangandam niini.

Lakip sa nangandam sa maong daku’ng kalihokan mao ang inyong kabomberohan, gani andam na sa APEC 2015.

Dako kaayo ang role sa Bureau of Fire Protection (BFP) sa maong kalihokan. Pila ka buwan ang milabay gimandoan ang BFP-7 sa APEC organizing committee sa pag-inspeksyon sa tanang hotels dinhi sa Sugbo nga maoy venue sa conference ug maoy istaran sa mga delegates.

Nahatagan og fire safety clearance ang maong mga hotels ug nagpasabot nga hingpit na kini nga andam. Sa pagka karon, nagpadayon ang inyong kabomberohan sa pag-conduct og training ug seminars sa ubang ahensiya sa gobiyerno kabahin sa incident command system ug uban pa nga teknikal nga trainings diin eksperto ang inyong kabomberohan.

Gihangyo ang publiko sa pagkooperar sa mga awtoridad aron hapsay ug magmalampuson ang atong pag-host sa APEC 2015.