Sunod tuig pa ang eleksiyon apan tataw na kun kinsa ang molansar sa pagka-mayor sa siyudad sa Sugbo.
Sila mao si Mike Rama batok Tommy Osmeña nga pulos na nakalingkod isip amahan sa katawhan. Ug tin-aw nga makita kun unsa ang ilang agi? Unsa ang ilang dinad-an?
Si Tommy maoy nag-umol sa South Road Project (SRP) aron kapahimuslan kini sa mga motorista nga magbiyahean gikan sa South paingon nganhi sa siyudad sa Sugbo ug vice-versa.
Nakatabang kaayo ang daku’ng wanang sa SRP sa pagpaluag sa trapiko. Ang biyahe sa Carcar City paingon sa Cebu City nga kaniadto moabot og 1 ka oras o duha tungod sa heavy traffic karon madala na lang og 45 minutos.
Bulahan si Mike nga nakasunod sa agi ni Tommy kay makabaligya na man siya sa mga business lot sa SRP nga maoy bunga sa pagpaningkamot kaniadto ni Tommy.
Ang higante ug habog nga SM ni Henry Sy nga mibarug na sa SRP hapit na mahuman. Sa pagbarug pa lang niini, daw nagpangamay na sa ubang mga milyonaryo nga investors sa pagtukod ‘sab sa ilang kaugalingong negosyo.
Ingon sa pagahikit-an na sa unahan, nga sama sa uhong, kalit lang unya manuybo ang mga tag-as ug dagko nga commercial buildings ning dapita.
May kabahin na sa SRP nga nahalin og bilyon ka pesos ubos sa pamunoan ni Mike. Ang pangutana. Naimpasan na ba kaha ni Mike ang Japan sa atong daku’ng utang?
Si Tommy istrikto. Nahimo nga istrikto tungod sa prinsipyo sa kinabuhi nga maoy gusto niya nga ipasunod sa katawhan. Kun unsay iyang gusto maoy matuman.
Mao nga kun magpahimo gani siya’g ordinansa pinaagi sa City Council, hugot g’yud niya kini nga ipatuman. Samtang si Mike subra ka mahigalaon.
Apan may naka-obserbar nga ang iyang pagka-mahigalaon milubad. May nakamatikod ‘sab nga kulang sa kahugot ang pag-implementar niya sa mga balaod.
Bahin sa peace and order, sa panahon ni Tommy, menus ang krimen nga mugna sa gidiling drugas apan ning panahon ni Mike, misulbong ang crime rate tungod sa pagkuyanap sa shabu, lakip na sa kabukiran.
Mao kini ang pipila ka performance nila ni Mike ug Tommy. Kun sa eleksyon sunod tuig sila g’yud ang magkaatbang, timbang-timbanga g’yud pag-ayo kun hain nilang duha ang angay’ng pi lion.