EDITORYAL - AFP: Weakest in Asia

Ang Pilipinas maoy pinakagamay og budget alang sa militar niini itandi sa mga silingang nasud maong di ikatingalang gitawag kining ‘weakest in Asia.’

Niadtong Miyerkules, ang mga heneral sa Armed Forces of the Philippines pinangulohan ni Brig. Gen. Guillermo Molina, nangayo sa Ubos Balay Balauranan og katuloon ka pilo nga budget sa mosunod nga lima ka tuig.

Makatarunganon kini tungod kay ang Pilipinas lang sa Southeast Asia ang dunay budget sa militar nga wa kaabot og uno porsiyento sa Gross Domestic Product niini kada tuig.

Ang GDP mao ang sukdanan sa kinatibuk-ang produksyon sa ekonomiya ug labok niini sa merkado. Gipakita niini ang kinatibuk-ang kantidad sa mga produkto ug serbisyo sa usa ka nasud sud sa usa ka panahon o tuig.

Kun taas ang pagtubo, nagpasabot nga himsog ang ekonomiya, ang himsog nga ekonomiya nangahulogan nga daghan ang namuhonan ug daghan ang nakatrabaho. Ang Pilipinas ikatulo sa dunay maayo og GDP sa SEA sa tuig 2014.

Ang ubang mga nasud sa SEA, nigahin og dos ngadto sa tres porsiyento sa ilang total GDP alang sa ilang militar aron epektibong madepensahan ang soberiniya, dungog ug garbo sa ilang mga nasud.

Sa 2016, P129.1 bilyones ang gipangayo sa AFP, apan wala gani gihapon kini kaabot og usa ka porsiyento. Sumala pa sa militar, aron epektibong maangkon sa AFP ang “minimum credible defense” magkinahanglan mogahin ang gobiyerno og P308 bilyones kon dos porsiyento sa GDP.

Mabasol kini sa nagpasulabing pagduda nga basin ibulsa ang budget. Hinuon, ang AFP di man makapangangkon nga  limpyo og record sa kurapsyon sukad pa kaniadto.

Apan may problema na karon tungod sa agresibong pagpangilog sa mga teritoryo sa Pilipinas.

Ipadaplin una kining pagduda kay ang kwarta makita ra, apan ang teritoryo sa Pilipinas nga nailog na sa China dili katupngan og presyo ug di na mabawi.