EDITORYAL – Kuyaw nga sakyan

Wala malilong sa mga tinugyanan sa balaod nga daghang van for hires nga nagdagan karon ug gigamit isip pasaheroan bisan og walay prangkisa gikan sa Land Transportation Franchising and Regulatory Board (LTFRB).

Human gitak-opan sa hingpit ang One CitiLink Terminal diha sa Natalio Bacalso Avenue, ang mga van for hires anaa karon temporaryo nga naghimo og terminal sa bakante nga luna kilid sa Taboan Public Market.

Apil nga namalhin sa mao nga dapit ang mga van for hires nga walay prangkisa. Ang uban niini nagbiyahean paingon sa Toledo ug Balamban. Daghan ang nahibulong ngano nga wala kini pangdakpa sa mga enforcers.

Ang LTFRB-7 Regional Office adunay lista sa mga van for hires nga may prangkisa mao nga kun wala nila protektahe ang mao nga mga operators niining mga kulurom nga van for hire, dali ra kini madakpan.

Ang ilang himuon mao ra ang pakigtambayayong sa kadagkoan sa Land Transportation Office (LTO) aron madakpan kining mao nga mga kulurom nga van for hires.

Kuyaw ug risgo kaayo sa mga sumasakay kun makasakay sila niining mga kulurom nga van for hires kay panahon nga maaksidente ang sakyanan, dili sila mabayran sa insurance.

Ang kagamhanan angay nga mohatag og proteksyon sa mga sumasakay nga nagtuo nga ang ilang gisakyan kompleto sa mga papeles kay wala man pangdakpa sa mga tinugyanan sa balaod.

Dili ba klaro kaayo nga giprotehean sa mga tigpatuman sa balaod kining mao nga mga kulurom nga van for hires kay wala man nila pangdakpa bisan og nasayod sila nga wala kini prangkisa?