Ang ka-busy sa dalang Mandaue

Paingon ko sa siyudad luwan sa Ceres Bus. Dako ang akong pagtuo nga sa wa pay alas onse ako makaabot na sa Capitol Parish. Apan halos duha ka oras ang dagan sa bus mismo sa kadalanan sa Mandaue. Butang nga nakapahimo nakong late sa akong appointment sa may alas onse. Dili tuyoon nga bation nato ang kapikal. Apan unsaon ta man, wa kitaý mahimo tungod kay kita pasahero lamang sa hinay nga dagan sa maong sakyanan. Anaa ang kapikal tungod kay buot natong ma-on-time. Apan di sa tanang panahon nga ang kapikal angayang paminawon. Dunay mga higayon nga ang kapikal wa kinahanglana. Sama usab sa atong kinabuhing espirituhanon. Dunay mga butang nga di nato ma-enjoy gumikan sa atong naghinobrang pagplano sa atong panahon. Mao nga ang resulta nausik ang atong kahigayonan sa pag-enjoy sa gihatag nga kahigayonan sa Dios alang nato. Kining maong pamalandong ang nakapahinumdom kanako sa akong kasinatian uban sa akong mga pag-umangkon nga samtang kugos ko ang usa ang duha anaa sa akong kilid nangaon sa doughnut nga akong dala. Way daghang sulti, way daghang pangutana ang ilaha mao ra gyud ang pag-enjoy sa maong panahon nga nalatid nga mahitabo niadtong mga gutloa.