Nindot kaayo ang paghulagway sa sala labina diha sa Basahon ni Propeta Hoseas. Ang sala usa ka pagluib gikan sa kasabutan. Kun ang usa ka tawo mobudhi sa iyang kauban sa bisan unsang matang sa relasyon malisud ang pag-uli sa PAGSALIG. Kini usab ang pagpakasala. Nahimo kitang maluibon ngadto sa Dios. Apan lagi kay tawo ra man kita, anaa ang dakong posibilidad nga mahitabo gyud kini. Mao nga diha sa paghigugma dili maayo nga ihatag nimo ang tanan. Mas maayo nga magbilin ka alang sa imong kaugalingon. Maayo man ang pagpaubos apan dili maayo nga imong ihatag ang tanan nimong pagpakiluoy sa tawo nga wala gani magtagad sa imong kahimtang. Sa tawo kang kansang gihunahuna mao lang ang kaugalingon. Sa tawo nga way plano sa inyong ugma. Sa tawo nga buot lang og lulinghayaw ug palami sa kinabuhi. Mao tingali nga daghan ang dili gusto og Ginoo ingon man sa iyang pagtulon-an kay daghan kaayo og demands. Lisud ug bug-at pas-anon ang krus. Hagip-ot ang dalan padulong sa kaluwasan ug sayon ug halapad ang dalan padulong sa kalaglagan. Lisud man tuod ang pagkabalaan apan dili kini imposible. Mahitabo lamang kini kun atong ugmaron ang pagkamatinud-anon ug dili ang pagkamabudhion.