Dili na kinahanglan pa nga ipatawag sa Ubos Balay Balaoranan si Pres. Noynoy Aquino aron pa-esplikahon sa engkuwentro sa Mamasapano tali sa mga rebeldeng Moro Islamic Liberation Front, Bangsamoro Islamic Freedom Fighters ug mga pribadong armadong grupo ug sa mga Special Action Force nga mikalas og 44 ka police commando.
Mismo si House Speaker Feliciano Belmonte Jr. mipahibalo sa minoriya sa Kamara Baha nga dili nila itugot ang pagpatawag sa presidente. Angayan lang. Tungod kini sa inter-branch courtesy.
Dili na lang nato hatagan og labad ang atong mga kongresista nga maglalis kun husto ba o dili ang pagpaatubang sa presidente. Dili kini makaayo. Dili maayong talan-awon alang kanato nga makita si Noynoy nga gibalibali og pangutana sa mga kongresista. Maulaw usab kita kun ang atong presidente (bisan gihulagway sa uban nga dili maayo og kabuot) gipaubos sa imbestigasyon sa mga magbabalaod.
Apan kining maong lalis nakatabon kini sa labing importanteng butang nga angay bantayan sa mga Filipino. Kini mao ang Bangsamoro Basic Law nga naghinayhinay na karon og kamang sa Ubos Balay Balaoranan ug sa Senado.
Dungan niini ang pagtuyok sa estorya diha sa Facebook nga aduna nay “lobby fund” nga P20 milyones kada senador ug P50 milyones kada kongresista nga mopabor sa BBL. Siyempre, mahadlok kita tungod sa atong pagtuo nga daghan kaayo og kurakot diha sa Kongreso.
Ngalan sa usa ka dakong opisyal sa Mindanao Development Council kinsa usa usab ka AAA contractor ang milutaw nga maoy gikatahong maoy naggunit sa salapi isip lobby fund sa BBL nga giingong gikan sa Malaysia.
Hinuon, anaa man silang Senador Alan Cayetano, Tito Sotto, Miriam Defensor-Santiago ug uban pa nga nagtuo ko’ng dili mahaylo og kuwarta. Gani, usa kanila giplanohan na nga ipapatay tungod sa bokal niyang baruganan batok sa BBL.
Ang wala nako ganahi kay aduna pa gyu’y nakuhang mopa-papel sa isyu. Si Bise Presidente Jejomar Binay nanawagan pa gyud og “independent investigation” sa Mamasapano massacre.
Pastilan, daghan na kaayo og imbestigasyon ug makasamok. Gawas pa, wala’y kredibilidad si Binay nga manawagan og linain nga pakisusi kay siya mismo wala gani motuman sa tawag sa Senate Blue Ribbon Sub-Committee nga nag-imbestigar sa daghang proyekto sa Makati sa dihang si Binay pa ang mayor. Si Binay uban ang 22 ka tawo gikasohan sa Ombudsman.
Hangtod karon wala gyud atubanga ang Senado, unya motambag na hinuon siya og linain nga pakisusi sa Mamasapano massacre.
Nagtuo ko nga si DILG Sec. Mar Roxas ang girombo ni Binay. Kay wala man makadulot ang pagduot ni Senador Nancy Binay kang Roxas.
Si Binay ug Roxas gipaabot nga magsakbang sa 2016.