EDITORYAL - Suweldo ra’y giapas

Wala malilong sa kadagkoan sa Cebu City Traffic Operations Management (CITOM) nga problema kaayo ang trapiko dinhi sa dakbayan sa Sugbo, ilabi na sa “peak hours.” 

Usa sa makamugna’g problema sa trapiko mao ang pagpataka lang og parking sa mga sakyanan diha sa mga karsada. Adunay mga karsada nga gipalapdan aron unta mohapsay ang dagan sa mga sakyanan apan walay kapuslanan kay ang daplin gihimo lang gihapon nga parking area.

Ang mga traffic enforcers gitudloan kun unsa ang mga dili angay’ng himuon sa mga motorista ug gitahasan sila nga dakpon kadto’ng molapas sa lagda.

Apan daghang mga sakop sa CITOM nga mura lang og mga buta nga wala makakita sa gihimo’ng abuso sa ubang motorista nga anha moparking sa ilang sakyanan sa wala itugot nga dapit.

Sa ilang gihimo nakahatag sila og peligro sa ubang motorista ingon man risgo sa mga tawo nga imbes anha unta molakaw sa daplin sa karsada, adto na sa tunga kay ang ilang agianan giparkingan man sa mga sakyanan.

Makita kini’ng mao nga talan-awon sa ubay-ubay nga mga dapit dinhi sa dakbayan, sama sa dalan V. Gullas panahon sa buntag ug sa D. Jakosalem inigkahapon hangtud sa gabii.

Kun ingon niini ang batasan sa mga traffic enforcers nga agi-agian lang ang mga sakyanan nga giparking sa dili tukma nga dapit, mawad-an og respito ang katawhan sa mga traffic enforcers.

Masabot pa nga ang ilang pagtrabaho isip sakop sa CITOM gitumong ra g’yud aron sila makapalit og pagkaon apan wala sa ilang huna-huna nga masulbad ang problema sa trapiko dinhi sa dakbayan.