Ganti sa pagmalasakit

Usa kini ka estorya sa tinuod nga kinabuhi ni Marichu,P (atong gitago ang apelyido pagrespito sa iyang katungod).

Naikag ko sa  katalagsaon sa gisugid niyang libro sa iyang kinabuhi, nga unta kapanaminan kini nato nga himoong inspirasyon, nga magiyahan kita sa paglampos sa labing pait nga pakigbisog.

Sa edad nga 13 anyos, napungil na ang gihay sa iyang pagkabulak. Dinhi nagsugod ang kapait nga iyang gisagubang. Ang mapintas nga panudya sa iyang ginikanan inay pagsabot, gimaldisyon hinoon siya. Gipugos pa gyud nga mahimong bana ang galugos niya. Nanganak siyang gikasilagan sa ginikanan ug pinasagdan sa iresponsableng bana.

Permi kulata, bun-og, basta di tumanan sa gusto. Way trabaho bisyoso ug palahubog. Nagsirisiri siya unsaon pagbuhi ang lima niya ka anak. Tanang diskarte sa pangwarta gihimo niya. Bisan asa lang ipamilin ang mga anak aron lang makapangita og kakwartahan.

Di palang dugay, ang iyang ika 43 nga birtdi. Dihang niabot ko sa ilaha, nahingangha ko kay abi ko’g nangunot na nga naugtas sa mga problema. Masaypan mo siya nga 25 pa ang edad kay gwapa nga murag dalaga pa ang linihokan. Sa ngislit sa iyang pahiyum, imong mabatyagan ang kamalipayon sa iyang kahimtang karon. Minyo na ang 3 ka anak niyang pulos may trabaho ug ang 2 estudyante na sa kolehiyo. Adunay 5 ka apo, nga bigatin og mga maninoy.

Matud niya, wa siya’y pagdumot sa iyang ginikanan ug sa iyang bana, kay sila ang nagtudlo kaniya nga mahimong isog  sa pagsagubang sa kamatuoran sa iyang gidangatan. Kay may nakita siyang paglaum nga luyo sa kangitngit, karon inanay na nga mibanaag ang kahayag. Gikahinaman gihapo’ng mobalik ang iyang bana aron ikapasigarbo ang ganti sa kalamposan sa iyang pagmalasakit.