Ang Pangandak

Sugilanon kini sa duha ka misyonero ug mga teologo. Ang usa maisogon ug lig-on kaayo sa iyang pagpanudlo. Samtang ang usa, kalma ug luyahon. Sa dapit sila nagsangyaw, nahimutang ang usa ka CASA diin tua didto ang mga babayeng andam moalagad ingon nga pahungawan sa lawasnong katagbawan. Ang luyahon wala gyud moadto adtong dapita ni, mosulti na lang mahitungod niini. Samtang ang isog, kusganon nga misaway niini. Usa ka adlaw niana, nakahukom ang isog nga misyonero, nga iyang sulngon ang Casa aron iyang sangyawan ug kasab-an tungod sa maong kalaw-ayan. Iyang giagni ang iyang kauban apan kini nibalibad. Butang nga wala makapahimuot sa isog nga misyonero. Tuod man dinala ang rosaryohan ug ang bibliya, gisulong niya ang Casa. Ang mga inday hilay sa mga mahait nga mga pulong iyang giwalihan ug gibadlong. Iyang gisulod ang Casa. Apan sa kalit lang, nahinay og nahinay ang maisogon og kusganong mga pulong sa maong misyonero sa dihang usa ka maanyag nga babaye ang kaniya miduol ug… Nahilom ang maong misyonero samtang natak-op ang lawak diin sila misulod.

Hinumdomi kini:

Dili tanang inisog magdala og kadaugan, ug dili tanang pagtalaw nagdala og kapildehan. Mao nga kun sa tentasyon ikaw gyud mohasonghasong, nan matental gyud ang tawo. Kini ang positibong epekto sa kahadlok. Nga diha sa kinabuhi, mahinungdanon usahay ang pagtalaw aron di kita mabutang sa kapit-os.