EDITORIAL - MILF probe nakapasamot

Karon nagbangga na ang managlahing findings sa duha ka imbestigasyon kabahin sa dugoong Mamasapano encounter human gisumitir sa Moro Islamic Liberation Front (MILF) ang ilang kaugalingong imbestigasyon diha sa Senado.

Natural g’yud nga sukwahi ang ilang findings sa Board of Inquiry (BOI) sa PNP  ug mapunta ang basol sa PNP-SAF. Usa na niini ang pasangil nga gipangtiwasan ang mga polis bisan samaron na ug ang uban patay na dihang giusban sa pagpusil.

Ang findings sa MILF nag-ingon nga gigamit sa PNP-SAF ang mga patay’ng lawas sa ilang kauban isip taming ug kadtong mga grabeng pagkaguba sa mga nawong sa mga polis nga gituohang gipangtiwasan, resulta kuno kadto sa igo sa “high-caliber” firearms sa MILF.

Ang maong mga findings kalabot sa mga samad sa mga polis dili angay tuohan kay wala kini gibase sa autopsy.

Tataw kaayo nga depensa na lang nila kini tungod kay duna may mga video nga nagpakitang gitiwasan g’yud ang ubang mga polis, matud sa MILF wa maklaro kun ilang sakop ang nihimo niadto.

Imbes nga makatabang ang findings sa MILF, nakapatandog hinuon sa sakit nga gibati karon sa PNP-SAF ug sa ilang mga kabanay.

Mas maayo unta kun nipokus sila sa isyu bahin sa paglapas sa ceasefire agreement kay wa man silay expertise pag-abot sa mga ballistics ilabi na wala sila maka-awtopsiya sa mga patay’ng lawas.

Sa bisan unsang matang sa giyera, dunay mga patakaran nga angay sundon usa na niini ang dili makatarunganon ug dili tawhanon nga buhat nga pangtiwasan ang mga samaron.  Mao kini ang kasagarang gipatuman sa mga militar sa kalibotan.

Ang Pilipinas, isip signatory sa Geneva Conventions, kalkulado sukad pa kaniadto ang paggamit niini sa pwersa batok sa mga rebelde.