Pagsiwil sa mga babag sa kalinaw

Gipakita ni Presidente Benigno Simeon Aquino III ang iyang dako’ng tinguha nga maangkon ang kalinaw sa Mindanao hinungdan nga iyang gihingusgan ang sabot-sabot aron mamugna ang Bangsamoro Basic Law (BBL) nga tinguha niya’ng kaaprobahan kini atol sa iyang administrasyon.

Dalaygon ang gitinguha’ng kalinaw sa presidente ug angay gayud unta nga suportahan ang iyang tinguha kun matinud-anon lang ang kagamhanan ug ang gikasabot-sabot nga mga sakop sa Moro Islamic Liberation Front.

Ang nakaparat lang sa maong sabot-sabot sa kalinaw kay samtang wala pa makasugod ang atong mga magbabalaod pagdiskuter sa BBL daw namatikdan na ang pagsiwil sa mga babag nga nakapatumaw na hinuon og kabalaka sa katawhang Filipino.

Mitumaw ang maong mga kabalaka kay namatikdan man nga dili sinsero ang mga sakop sa MILF diha’ng wala’y kukaluoy nga ilang gipamatay ang 34 ka sakop sa PNP Special Action Force (SAF) didto sa Mamasapano, Maguindanao nga modakop unta sa duha ka international terrorist nga nagtago sa ilang dapit.

Ang laing namatikdan nga dili gayud matinud-anon ang MILF tungod kay samtang nagpadayon pa ang pagsabot-sabot sa kalinaw, misiwil man usab ang mga taho sa pagpalig-on sa ilang puwersa pinaagi sa pagpangrikrut og mga batan-on nila’ng mga sakop.

Naglakip na niini mao ang giingon nga training camp sa Dakbayan sa Iligan nga nakapatumaw na hinuon karon sa kabalaka nga ang katuyoan sa BBL mao ang paghimo sa MILF nga labing gamhanan nga kuyaw na hinuon kaayo ang pag-alkontra sa atong Demokratikanhong pangagamhanan.