Reklamo sa taxi drivers
Mao diay nga puwerteng bagulbol sa mga drayber sa taxi sa paglaslas sa plitehan og P10 sayo ning buwana kay naatol nga nitidlom ang gidaghanon sa ilang mga pasahero. Gibasol nila ang dakong gasto sa mga ginikanan sa final examinations ug graduwasyon sa ilang mga anak nga maoy nakaaghat nila pagdangop sa mas barato nga public utility jeepneys (PUJs).
Sa niaging pila ka adlaw, ilang napanid-an ang pagbalik na sa normal nga gidaghanon sa ilang mga pasahero. Mahimong nahaw-as na gikan sa mga bayranan sa mga eskuylahan. Maong di na sama kasibaw ang mga reklamo sa mga drayber tungod sa laslas sa plitehan ug mga pasahero tungod sa nagpaugat nga mga drayber.
* * *
Manguros na sab ang mga drayber sugod karong Semana Santa: Kanus-a gikahadlokan nga magsugod na sab pagtidlom ang gidaghanon sa ilang mga pasahero; sa mosunod nga mga semana nga bakasyon na sa mga tinun-an; ug mosamot pa gyud sa buwan sa Mayo kanus-a magtigom na sab ang mga ginikanan alang sa enrolment sa mga bata.
Masaligon hinuon ang pipila ka taxi drivers nga akong gikahinabi nga di hingpit nga tingbitay ang mga buwan sa Abril ug Mayo. Kay sa ilang kasinatian mas modaghan ang ilang mga pasahero kun mas ubos ang plitehan. Nagpaabot sila nga ang P10 nga laslas sa plitehan makahimo sa mga taxi nga mas madanihon alang sa mga pasahero nga magdali o di kaagwanta sa PUJs.
* * *
Nisumbong ang taxi drivers nako nga gipausbawan sa operators og P100 ngadto sa P200 ang inadlaw nilang abangan dihang nitidlom pag-ayo ang presyo sa lana sa niaging tuig. Wa sila moreklamo kay nidako man gyud tinuod ang ilang kita, labi na niadtong Disyembre kanus-a kasagaran sa nakadawat og bonus dali kaayong nakapara og mga taxi.
Dihang gilaslasan ang plitehan karong buwana, nanghangyo sila sa pagbalik sa naandan nilang abangan. Apan gibalibaran sila sa operators nga nidayon og pangangkon nga nimahal ang ligid ug spare parts.
* * *
May lain pa gyong reklamo ang taxi drivers nga hinaot tubagon sa Department of Energy (DOE): Obligado silang mopatubil og auto-LPG gikan sa estasyon nga gipanag-iya ra sab sa operators; apan mas mahal og hangtod P6 matag litro ang presyo, gawas nga nagduda sila nga kuwangan ang sukod; ug kun mopatubil sila sa gawas, multahan sila og hangtod P2,000.
Deregulated ang industriya sa lana. Makadupa ba ni sa klarong pamintaha sa pipila ka taxi operators? May lisensiya ba ning ilang LPG stations? Kun di sila kabut-an sa presyo, kabahin ba sa ilang mga katungod sa pagpanag-iya sa taxi units ang gahom sa pagmonopoliya sa pagsuplay og auto-LPG? Istrikto kaayong gobiyerno batok sa taxi drivers, nganong morag lubay man batok sa operators?
* * *
- Latest
