Morag lisod siguro nga masulbad pa ang problema sa trapiko dinhi sa Metro Cebu, ilabina sa dakbayan sa Sugbo. Kini kun wala gayuy dakong solusyon nga iplastar ang atong mga lokal nga kagamhanan batok niini.
Sa pagkakaron, nagkapuliki na og pangita og mga solusyon ang atong mga opisyales. Bisan unsa na lamang nga ideya ang ilang nahunahunaan aron lagi pagsulbad niining nagkadako nga problema.
Dinhi sa dakbayan sa Sugbo, maoy gipahimungtan ni Mayor Michael Rama ang mga barrier sa mga dagkong karsada. Gani hangtud karon, busy ang mga City Hall personnel pagbungkag sa dakong island tunga sa Escario Street.
Grabe gayud ang trapik diha sa maong lugar. Gani matag buntag dako kini nga kalbaryo sa mga moagi dihang dapita. Ug bisan pa man sa pagpaluag sa maong karsada, wala gihapon mominor ang kahuot sa trapik.
Dili lamang ang Escario Street. Tanang nag-unang karsada sa dakbayan ang nagtangag usab og susamang problema. Daghan ang nagsugyot og widening. Apan tungod lagi kay dagkong mga establisemento ang maigo pag-expand sa karsada, bilyones usab ang magasto sa siyudad. Tungod niini, usa lamang nga solusyon ang nakita ni Kongresista Raul del Mar sa problema sa trapiko ning dakbayan. Kini mao ang pagtukod og mga dalan sa ibabaw o pagkalot aron paghimo og moderno nga subway.
Alang kang Del Mar, lisod na ang widening karong panahona gumikan sa ka dako sa gasto kay dagko man nga mga establisemento ang mapagan. Ug ang sulbad niini mao ang pagtukod og agianan sa ibabaw ug ubos.
Daan nang mihimo og lakang si Del Mar sa Kongreso alang sa pagtukod og dakong subway gikan sa norte ngadto sa south ning dakbayan sa Sugbo. Ug hinaut nga matuman kini sa dili madugay. Ilalum sa sugyot sa maong kongresista, dili lamang mga behikulo ang makabenepisyo sa subway. Kini tungod kay mahimo kini nga butangan og riles alang sa train ug pedestrian ug bicycle lanes.
Mahimo usab ang subway nga kabutangan og mga underground cables sa mga telecommunications ug power distribution companies. Labaw sa tanan, ang subway mahimo nga kaagian sa mga tubig aron pagsulbad sa problema sa mga pagbaha sa dakbayan.
Nindot kini nga panglantaw ni Del Mar nga angay lamang suportahan sa mga Sugboanon. Ug hinaut nga dili kini mabiktima sa pamulitika sa uban natong mga lideres.