Ang peso nga bulawan

Ang peso maoy barometro o sukdanan sa kantidad sa atong kuwarta. Unsa man kadako o kadaghan sa atong kuwartang kitaon o gastohon, ang bili sa peso mas daku pa kay sa bulawan. Wa kaayo kita makaamgo niini, nga kadaghan sa mga anaa sa kahamugaway, nangasenso ilabi na kadtong nagnegosyo o mga tawong hilig kaayo modaginot sa peso. Kay ngano diay?

Sa tanang lihok nato, pila kahay matigum sa peso lang kun ato pang pangayoon ang diskuwentong peso sa senior o estudyante? Pila kaha sa driver ang matigom? Kun dili ka mohangyo sa paliton, pila nay peso ang nawala nimo. Kun dili pangayuon ang sukli  o kaha kalimtan na lang kay lagi peso ra ug gamitoy ra ang pag-ila sa peso. Wa kaila sa peso nga kini diay bulawan.

Kun atong sumadahon ang mga peso, nahimo kining dakong  kuwarta nga wala ni nato matagad nga dako sab diay ang pagkausik. Sama ra gilubong  ang mga pesong tipaka sa bulawan sa lapok nga wala nato kapahimusli nga naghatag unta’g opportunidad nga kapuslan sa mga pangandoy sa kinabuhi.

Usa ni sa sekreto sa kahamugaway sa atong kahimtang ning kinabuhia. Ilhon gyud ang peso sama kabilihon sa bulawan.

Aron dili ni basta mawala sa atong panudlanan. Kinahanglan kuptan ug matigom. Dili basta isalibay nga way rason. Patuboa nga magamit nga may dakong kapuslanan. Himoa ning atabay o tuburan nga dili ka kahutdan sa imong kalihukang kaugmaran.

Aduna ko’y anak nga may maayo’g trabaho nga nakat-on sa negosyo nga peso-peso nga tubig, peso-peso nga kendi, peso-peso nga computer ug ubang baligya nga peso nga dili mahilabtan kay ihulog ra man. Ang nakaapan lang kay, ako’y maalkanse kay permi mohulam og mameso nga malimtan nato’g paningil.