Edukasyon sa kahimsog

CEBU, Philippines – Unang prayoridad nato ning kinabuhia,  mao ang pagbaton o pagkab-ot sa edukasyon alang sa maayong kaugmaon. Busa estrikto kaayong atong gisilsil sa kabataan, ang nagkalainlaing propesyon aron pagbaton o pag-ugmad og lig-on ug ligdong nga kasandigan sa kinabuhing haruhay.

Daghan ang nakatapos sa mga pagtuon gumikan sa pag-edukar sa kabililhon sa edukasyon mahitungod sa ilang kinaham nga propesyon. Apan subo lang kaayo ang paningkamot. Nagmalampuson unta sa kinabuhi apan napakyas sa pagpakabuhi. Unsaon kay nataligam-an ang mas bililhon nga mopalahutay sa kinabuhi, nga mao ang edukasyon sa kahimsog. Dili ba?

Bisan unta may maayo na kitang propesyon, angay nga ato usab hatagan og igo nga edukasyon sa pagtuon kabahin sa atong panglawas. Dili na kinahanglan magtuon kita’g medesina. Ang importante nga  makat-on kita nga mahimong kinamaayohan nga doctor sa kaugalingong panglawas.

Obserbahe ang atong palibot, nga daghang estudyante o trabahante nga masakiton na, wa lang manumbaling nga naunsa na ug ngano nga naingon niana. Giisip na lang nga komon ang maong gipamati sa panglawas, mao nga di sab nato ikahibulong nga daghan ang naproblema sa balatian kun mograbe na.

Bisan unta wa ta kaayoy kasinatian mahitungod niini, bentaha nga aduna gyu’y kahibalo sa mga hinungdan aron diha-diha masanta na nga di mosangpot sa mas daku pa nga kahasol sa panglawas. Taas kaayo ang pangandoy nato sa kinabuhi apan ubos ra ang kahibalo sa panglawas.

Kini unta ang mopalahutay nga makaabot ngadto sa katuyoan. Apan aron makaseguro tang malipayong malampuson, angay tinguhaong makakat-on kita sa kahimsog sa panglawas.