EDITORYAL - Edwin Ian Melecio

Nahimo karong isyu ang laing gidudahang anomalya sa pagpalit sa Department of National Defense sa 21 ka mga refurbished combat utility helicopters nga nagbalor og P1.2 bilyon.  Duna pay migawas nga report nga dili pa gani magamit ang maong mga helicopters.

Gipasangil sa kanhi partner sa nakadaog nga kompanya sa bidding nga ubos nga klase ang UH-1D  helicopters itandi sa UH-1H ug matud pa obsolete na ang mga spare parts niini mao nga lisud na pangitaon kun maguba.

Apan ang kadagkoan sa PAF nga mipahigayon og flight test mibutyag nga flyable ug operational ang maong mga helicopters ug duna pay test pilot nga midayeg kay mas maayo pa kini itandi sa UH-1H.

Gani ang duha niini gipaubos na sa endurance ug flight tests, samtang anaa pa sa assembly stage ang lima.  Giklaro usab sa PAF officials nga di tinuod ang report nga wala na kini piyesa tungod hangtud karon daghan pang mga nasud ang nigamit sa UH-ID model nga ginama sa Dornier sa Germany.

Apan base sa mga defense forum blogs diin pipila sa mga miyembro adunay kasayuran sa mga helicopters, ang UH-1H ug UH-1D pareho ra nga klase nga choppers, ang “D” designation nagpasabot lang og Dornier nga bersyon nga kataposang naghimo niini niadto pang 1980s.

Samtang nag-atubang og dakong problema sa pundo ang AFP alang sa modernisasyon niini, dili maayong paminawon sa publiko ang mga ingon niini nga mga isyu. Angay nga tan-awon og maayo kun alkanse ba g’yud ang gobiyerno sa maong pagpalit.

Apan dili makatarunganon nga pasanginlan dayon ang DND o kadtong mga nalambigit sa procurement process nga nangwarta tungod lang kay dunay mikisikisi. Kung buot tan-awon ang isyu daw dunay panagribal tali sa mga kompanyang gustong makasakay sa maong transaksyon. Ang nakaparat pagan na usab ang kredibilidad sa DND.