Ang grabe’ng problema sa trapiko sa dakbayan sa Mandaue mahatagan unta og sulbad kun si Mayor Jonas Cortes nagpakabana pa niini nga isyu.
Apan unsaon, wala g’yud kita makadungog nga mihimo siya sa sagad buhaton ni Mayor Michael Rama nga mangunay g’yud pagsusi kun may problema sa trapiko.
Ambot og nakakita ba kaha si Mayor Cortes sa dagko kaayo’ng box culvert nga anaa gipangbutang sa karsada nga nakababag g’yud sa usa ka “lane.”
Anaa kini gibutang niana’ng karsada nga gikan sa National Highway sa Mandaue paingon sa Barangay Bakilid. Ngano’ng gitugotan man nila nga ibutang og dugay ang mao nga mga box culvert diha sa karsada?
Dugay na kaayo nga nagreklamo ang mga motorista diha sa Mandaue sa grabe’ng problema sa trapiko apan wala gayud makadungog ang publiko kun unsay gihimo sa mayor.
Dili usab masayon-sayon nga pakighinabian si Mayor Cortes kay lihay pa’s langgam manatad kun duolon na sa mga sakop sa media.
Kun kaniadto nindot kaayo ang pagbutang og mga dagko nga “center islands” nga ang uban gihimo’ng dekorasyon taliwala sa karsada, karon aduna na’y panginahanglan nga hulipan na lang kini og gagmay nga road separators. Pinaagi sa pagkuha sa mga lapad kaayo nga center islands diha sa karsada, madugangan ang gilapdon sa karsada ug makahatag kini og gamay’ng sulbad sa problema sa trapiko.
Kini mentras tanto nga wala pa’y igo nga gahin ang kagamhanan nga ibayad sa mga tag-iya sa yuta nga gamiton sa pagpalapad sa karsada.