Problema sa parkingan

Mao na ni karon, namalit og sakyanan apan wala’y grahean. Anha ra’s karsada iparking. Apil ni sa mga problema nga atong nadawat.

Brgy Talamban, Cebu City

Patabang unta mi sa CITOM o LTO7 kay ang eskena kilid sa karsada padu’ng sa Brgy Budlaan halos dili na makasulod ang mga sakyanan tungod niana’ng daghang habal-habal kay gihimo na kini nila nga terminal ug usahay ang uban magpatunga pa kay mag-ilog sa pasahero.”

Brgy Giloctog, Barili, Cebu

“Naunsa na man ni’ng among tinubdan sa tubig diri kanunay man nga way agas. Unya kun panahon sa tigbayad, pabayron dayon mi, on time gyud pero ang ilang serbisyo bati kaayo kay kun dili moagas dugay atimanon.”

Brgy T Padilla, Cebu City

“Kining dapit sa T. Villa mamalihug unta mi’g paabot sa CITOM kay maglisod pag-agi ang mga sakyanan panahon sa gabii kay gihimo na man hinoong parkinganan. Usahay double parking pa g’yud. Naa man unta’y gibutang nga No Parking sa kilid. Way kapuslanan ang re-blocking sa balay diri kay ang karsada nga gihimo para unta sa mga firetrucks kun simbako naay sunog gihimo na man hinuong parking area.”

Brgy Duljo-Fatima, Cebu City

“Diri sa Sitio Laguna gubaon man ang dalan ug lisod maagian kay lapok kun magtubig. Mao ra ba kini kanunay agian sa mga tawo. Among mga opisyal sa barangay mura’g wala man magpakabana pagsulbad niini’ng problemaha nga dugay na kaayo ni nila’ng gisaaran nga ipaayo pero hangtud karon wala pa g’yud atimana.”

Brgy Mactan, Lapu-Lapu City

“Diri sa among lugar daghan man gihapon nga mga trisikad ug tricycle nga moagi sa highway nga gidili man unta na sa balaud labi na sa city ordinance. Maayo unta’g aksyonan kini sa taga traffic division kay samok kaayo makapasamot sa trapik diri sa among lugar.”

Brgy Labogon, Mandaue City

“Palihug ipaabot sa TEAM kini’ng problema sa double parking sa mga sakyanan sa dalan gikan sa eskena tuyok sa lapyahan ug Sitio Chicos kay lisud na’ng maagian sa mga sakyanan. Gawas sa mga sakyanan nga mag-parking naa pa g’yuy mga tangkal sa manok nga ibutang daplin sa karsada nga makadugang sa problema.”

Brgy Tinago, Cebu City

“Patabang unta mi kay gamay na kaayo ang agianan padu’ng sa Tejero Elementary School kilid sa sapa duol sa taytayan. Misamot kagamay kay gikural man hinuon, luoy kaayo ang mga bata nga moagi kay magtakilid na lang intawon para makalahos sa gawas. Unta maaksyonan dayon ni’ng problemaha Sir.”

Brgy Ermita, Cebu City

“Ako lang unta’ng ipaabot nimo Sir Jun kining problema namo’ng mga trisikad driver diri. Lisod pa kaayo’g pangita’g pasahero naa pa g’yuy ubang tanod diha nga sige’g pangayo namo og ‘tag P5. Maayo unta’g maari nimo sir kay mabadlong ni’ng mga tawhana kay kini’ng ginagmay namo’ng pangita ila pa g’yud daginoton.