Nakapahabol og diyutay sa mga tulisok batok sa mga gipasanginlan nga nilawog sa mga sakop sa Special Action Force (SAF) ngadto sa tino nga kamatayon sa mga kamot sa mas daghang armadong mga manggugubat sa Mamasapano, Maguindanao mao ang di malalis nga pagkatuman sa usa sa mga tahas sa Oplan Exodus: Ang paghipos sa gipasanginlang terorista nga si Zulkifli bin Hir alyas Marwan. Makiangayon lang nga silotan ang duha ka nabantang nga utok sa operasyon niadtong Enero 25: Silang Direktor Heneral Alan Purisima, ang ni-resign nga hepe sa Philippine National Police (PNP) ug Direktor Getulio Napenas, ang girelibohang hepe sa SAF. Apan ang labing epektibo nilang panagang mao nga nakuha nila si Marwan.
* * *
Apan bisan ang kadako sa papel ni Marwan sa terorismo sa Mindanao ug ubang bahin sa Asya gilalisan na. Gilantugi sa Institute for Policy Analysis of Conflict (IPAC) nga nagbase sa Jakarta, Indonesia ang pangangkon nga si Marwan maoy Osama Bin Laden sa southeast Asia.
Mahimong nagkasungi ang ilang bersiyon sa duguong engkuwentro sa Mamasapano, apan nagkauyon silang Presidente Noynoy Aquino ug ang kadagkoan sa militar ug kapolisan ug bisan sa Estados Unidos: Nga si Marwan eksperto sa bomba, responsable sa pagpamomba sa Bali, Indonesia niadtong 2002 ug sakop sa central committee sa Jemaah Islamiyah (JI).
* * *
Segun sa komprehensibo nga pagtuon sa IPAC, di tinuod nga si Marwan eksperto sa bomba ug labaw nang di siya opisyal sa JI. Matud sa IPAC wa gani ebidensiya nga si Marwan nagsilbing usa sa mga lider sa terorismo sa Mindanao. Kanhi kaubanan ni Marwan nga nahinabi sa IPAC nihulagway niya nga hingigo (sharpshooter), daghan og modernong armas ug daghan og kuwarta tungod sa hinabang sa iyang igsuon sa wa pa madakpi ug gipriso sa California sa Estados Unidos; apan di siya mapuslanon busa wa dasiga pagkuyog sa mga operasyon kay dali rang matarantar ug hapit pa gani magka-unay sa iyang kaubanan.
* * *
Ang resulta sa opisyal nga imbestigasyon sa Board of Inquiry (BOI) sa PNP nga gitakdang ipagawas na karong adlawa gipaabot nga molista sa duha sa labing dagkong atraso ni Napenas:
Kapakyas pakiglambigit nilang Armed Forces Chief Gregorio Catapang, Interior Secretary Mar Roxas ug PNP Chief Leonardo Espina nga makatabang unta pagpanalipod sa naapiking SAF commandos; ug
Pagdumili pag-usab o pagkanselar sa operasyon bisan nagkatibuwaag ug nalangay pag-abot sa ilang destinasyon ang SAF commandos. Mas dako ang atraso ni Purisima: Niinsistir pagduma sa operasyon bisan suspendido na. Nga mao say labing dakong tulubagon ni Aquino. Mas dakong kapildehan mao ang kalangay o kapakyas pagpasar sa Bangsamoro Basic Law (BBL). Daghan pa untang higayon pagkuha ni Marwan. Ambot may lain pa bang kahigayonan pagkab-ot sa malungtarong kalinaw sa Mindanao.
* * *