Ang katawhan kabahin sa BBL

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Brutal ang pagpatay sa 44 ka polis didto sa Mamasapano, Maguindanao niadto’ng Enero 25. Mura g’yud ko'g kahilakon pagkakita sa video. Duna pa’y buhi unta nga polis, apan gitiwasan pagpusil makaduha o makatulo.

Unya? Angayan ba nga ipapasar ang Bangsamoro Basic Law? Nahuman na lang ang hearing, wala pa gihapon kita makabati og kamatuoran. Asa man ang hustisya sa mga SAF 44? Mura'g ila ra nga gitabun-tabonan.

Bisa’g si Presidente Aquino mura'g wala'y pagpakabana sa nahitabo kay nagsige lang og likay sa isyu. Ang nakita ra intawon sa mga senador kay si suspendido nga PNP chief Allan Purisima nga maoy sad-an sa mao nga hitabo.

Sa atong pagtimbang-timbang sa isyu makapangutana kita kun may makuha pa ba kita nga kamatuoran diri? Nagpabaga ra man tawon na si Purisima kay bisan og suspendido nag-apil-apil gihapon sa kalihukan sa kapolisan.

Ang mga pamilya intawon sa mga namatay, napungot pag-ayo ug naglibog sa gisangpotan sa hearing. Si  PNoy nagpatawag og tigum sa niagi’ng buwan uban ang mga kongresista kabahin sa Bangsamoro Basic Law. Ganahan na lagi kuno siya nga ipasar na ang BBL.

Supak ko nga mapasar ang balaud kay dako kini’ng tamparos kanato’ng mga Filipino. Gusto mo nga ang atong buhis ihatag ra sa mga kriminal nga dako?

Kusog ra ba kaayo manglimod sa hearing nga dili sila ang nagpatay sa atong mga pulis. Kusog ra ba ‘sab kaayo sila moingon nga dili massacre ang nahitabo. Unsa man diay to ang akong nakita nga pati ang sampot sa mga polis,gihubo na?

Maayo ra ba sila moingon nga ang BBL ra maoy makasulbad sa Mindanao? Kung dili kuno ihatag sa gobiyerno ang ilang gusto, manimawos sila.

Naunsa na man ni si Presidente Aquino uy? Mura'g gitionan na man siya sa kriminal. Unta maminaw usa siya sa katawhan. Klaro na kaayo nga ang MILF ang nagpatay, apan molimod gihapon. Unya kita nga katawhan, husto ba kini’ng gihimo ni Presidente Aquino?

Kun husto man ang gibuhat niya, angay ba siya pakanaugon sa puwesto? Kun nakig-negotiate ang MILF sa gobiyerno, ngano’ng ila man gipatay ang atong mga pulis?

Kun magbinulok gani si PNoy og balik, mahitabo g’yud ang dili maayo -- simbako lang, labang og pito ka lawod. Magpakabana na ta!