Paghiusa sa Mabolo Seniors

Nagmalampuson ang tinguha sa taga Barangay Mabolo paghiusa sa duha ka pundok sa mga senior citizens, diin ilang gihimo ang unification election kaniadto’ng Pebrero 21.

Ang election gidumala nila ni Barangay Konsehal Aking Ruiz, senior citizens coordinator ug Emma Colina, ang GAD Focal.

Napili nga presidente sa Mabolo Senior Citizens Organization mao si Raymundo “Boy” G. Biaras ug ang iyang bise presidente mao si Jose M. Lanete.

Ang ubang opisyal mao sila si Celedonia P. Cabalhin, secretary; Zenaida B. Ompoc, assistant secretary; Evelyn O. Ardonia, treasurer; Sotero M. de la Cruz, assistant treasurer; Esteban I. Esgana, auditor;  ug mga PROs: Florentino M. Paltinca, Rodulfo B. Arceo, Patrocinio M. Fontanar ug Marilyn Tan.

Board of Directors: Virgilio J. Cabalhin, Marina R. Barro, Bella A. Digor, Florentino O. Ygot, Emma Sedillo, Gregorio V. Tidoso. Leonora L. Ayaay, Julia C. Fuentes. Ang induction pagahimoon karong Marso 4 sa Barangay Social Hall uban ni Kongresista Raul del Mar nga maoy mopapanumpa kanila.

Congratulations kanilang tanan. Dako ang kalipay ni Kapitan Reynaldo B. Ompoc ug sa mga sakop sa konseho sa barangay ni’ng maong kaugmaran.

Ang Mabolo Senior Citizens Association, usa sa labing aktibo nga kahugpongan sa mga senior citizens ni’ng dakbayan, gumikan sa full support nga gihatag ngadto kanila ni Kapitan Ompoc ug sa ubang opisyal sa barangay.

Matud ni Boy Biaras, si Kapitan Ompoc usa sa naningkamot nga mahiusa ang duha ka pundok sa mga senior citizens sa Mabolo. Ug karon ila nang na-realize ang maong mga tinguha.

Unta mahimo usab kini sa ubang mga barangay. Ug unta, ang mo-initiate niini mao g’yud ang mga kapitan sa barangay. Usahay gud, sila man kuno ang makaingon sa pagkatibulaag sa mga barangay chapters.

I hope dili ‘sab tinuod ang atong nadunggan nga duna kuno’y mga pundok nga wala makadawat sa ilang 1% allocation gikan sa budget sa ilang barangay.

Nag-angat na ra ba ang election, unta dili duhigan sa politika ang mga kahugpongan sa senior    citizens.

Si Biaras mipahinumdom usab, pinasikad sa pahibalo ni Jessica Silva sa PhilHealth, nga gikinahanglan nga magparehistro ang mga senior citizens alang sa PhilHealth coverage.

Gisugyot nga dili mag-inusara ang pag-apply, kun dili, in batches, in groups, aron mas sayon ang pag-process niini. Adto sa buhatan sa OSCA i-submit ang mga ngalan.

Mas maayo, ubanan sa 1x1 sa inyo’ng labing bag-ong hulagway, kay tingali unya’g dili na maklaro ang inyong retrato sa OSCA ID.

Tuod, automatic na ang PhilHealth coverage sa tanang senior citizens, apan kinahanglan ang pagparehistro.