Proof of custody

Dear Atty. Divine,

Ang akong igsuon duna’y duha ka anak – singko ug siete anyos - nga pulos illegitimate. Ang ilang amahan wa na g’yud magpakita sukad pa niadto’ng 2000. Naminyo ang akong igsuon og foreigner ug karon tua na siya nagpuyo sa gawas sa nasud. Ang iyang duha ka anak gusto niya’ng dad-on ug pag-file niya og Petition alang sa ilang visa gipangayoan siya og Proof of Custody. Unsa may iyang i-submit aron pagmatuod nga siya ang nag-custody sa mga bata? Kinahanglan pa ba siya’ng moadto sa korte? Hinaut imo ming magiyahan kun unsay angayan namong buhaton. - Abby

Dear Abby,

Dili na kinahanglan nga modangop sa korte ang imong igsuon alang sa custody sa mga bata kay ubos sa atong balaod sa Family Code of the Philippines ang inahan maoy dunay sole parental authority sa iyang illegitimate nga anak. Ang maayo niya’ng buhaton mao ang pagpangayo og Certification sa Barangay diin nagpuyo ang imong igsuon nga maglatid nga anaa sa iyang custody ang mga bata sukad sa pagkatawo ug mangayo ‘sab siya og Certification gikan Department of Social Welfare and Development (DSWD) may labot sa iyang pag-custody sa mga bata aron mao kini ang iyang i-submit isip proof of custody sa iyang Visa application sa iyang duha ka anak. Unta akong natubag ang imong mga pangutana. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@ yahoo.com ug akong tubagon ang inyong pangutana matag Miyerkules ug Domingo pinaagi sa akong column.