Ang mapa simbolo sa direksiyon. Mahinungdanon kaayo nga maantigo kitang mobasa og mapa. Gikinahanglan natong masayud kun asa kita padung ug unsaon nato pag-adto sa atong padulngan. Kun kini ang nigawas nga imahen diha sa imong damgo, ang maong damgo pahigmata kanimo sa imong dakong tinguha nga mamahimong magiyahan diha sa imong panaw sa kinabuhi. Tingali karon, wala kay kapaingnan. Tingali karong mga higayona, dakong gubot ang imong hunahuna. Karon Kwaresma. Panahon karon sa paghimo og han-ay ingon man hustong giya sa atong kaugalingong kinabuhi. Uban sa dakong tinguha sa kabag-ohan ingon man ubos sa landong ug giya sa Kahitas-an.