Angay ba nga bahinan ang asawa?

Dear Atty. Divine,

Tulo mi ka magsuon, pulos lalaki ug pulos na minyo. Negosyante ang among amahan ug iya mi’ng gihatagan og puhonan sa negosyo kay patay na man ang among inahan. Gihatagan ‘sab mi og duha ka sakyanan nga magamit sa among negosyo. Apan ang usa namo ka igsuon gipatay ug mao kini ang akong mga pangutana. Kinsa man ang legal heirs sa akong igsuon nga wala man siya’y anak apan aduna siya’y asawa. Mahimo ba nga maka inherit ang iyang asawa o ang among mga asawa sa negosyo?

Unsaon namo kini pagsulbad nga dili maguba ang among maayo’ng relasyon sa pamilya. - Mar

Dear Mar,

Kun wala mo magpirmahanay og marriage settlement o Prenuptial Agreement uban sa inyong asawa sa wala pa kamo maminyo, then ubos sa balaod ang bisan unsa’ng property nga inyong mapundar  sud sa inyo’ng kaminyuon makonsiderar nga inyo kini’ng duha bisan pa kun wala siya’y actual nga natampo. Gumikan usab kay legal wife siya then entitled siya nga mo-inherit sa kabilin kun motaliwan ang iyang bana kay ang legal nga asawa o bana compulsory heir kini base sa balaod. Ang maayo ninyo’ng buhaton karon mao ang pagpakigsabot na lang sa asawa sa imong igsuon. Isugyot  ninyo kaniya nga inyo na lang bahinon in equal share ang kabilin sa imong igsuon nga namatay. Apan kun buhi pa ang inyong amahan, ubos sa balaod mas duna siya’y katungod kay sa mga igsuon busa mahimo nga inyo’ng isugyot nga ang asawa sa imong igsuon ug ang imong papa maoy magbahin sa nahibilin nga property sa imong igsuon. Mas maayo nga inyo na lang kining sabot-sabotan nga makiangayon sa tanan aron dili  maguba ang inyong maayo’ng relasyon. - Atty. Divine