Naawngan ang atong pagsaulog sa Valentine’s Day sa dugoong hitabo didto sa Mamasapano sa Maguindanao, Mindanao.
Human sa gubat tali sa PNP Special Action Force (SAF) ug Moro Islamic Liberation Front (MILF) ug Bangsamoro Islamic Freedom Fighters, ang media mitutok sa mga panghitabo as if wala na’y laing hitabo nga angay’ng hatagan usab og pagtagad.
Tanang komentarista sa radio ug telebisyon, ug tanang kolumnista sa mga mantalaan, silang tanan nag-inilogay pagmantala sa ilang mga opinion.
Unya, imbestigasyon dinhi, imbestigasyon didto, ug ang tinguha sa maong mga imbestigasyon, mao ang pagpagula sa tinuod, kinsa ang sad-an. Gigaling pag-ayo ang kapolisan ug kasundalohan, as if sila ang sad-an.
Ang akong gikahadlokan nga ang direksiyon sa mga imbestigasyon, mura’g nagpuntariya sa kapolisan, kasundalohan, ug kang Noynoy nga maoy sad-an, ug wa’a na’y sala ang mga nagpatay sa kapolisan.
Ako nga ma-imagine, nga niini’ng nagpadayon nga mga imbestigasyon, diin ang mga polis ug ang military maoy gigisal pag-ayo, nagkatawa karon ang mga rebelde, naghuwat nga mo-resign si Noynoy ug kasilotan ang mga opisyal sa kapolisan ug kasundalohan.
Kataw-anan no, kun mao kini ang mahitabo ug alang sa uban, mao ra ba kini ang gusto nila nga mahitabo.
Ug sa imbestigasyon diay nga gihimo sa taga-Lower House, ambut pila ra to ka minutes ang akong pagpaminaw, kay wala na ko motiwas. Diha sa akong hunahuna nga naminaw lang unta sila sa imbestigasyon sa Senado, wa na unta maglain sila’g imbestigar.
Anyway, di na kita maghisgot niini, at least dinhi sa atong lindog. Ila na lang ni. Maghuwat na lang ta unsay sangputan niini’ng tanan.
In the meantime, mag-Valentine ta. Sa ato na nga nasayran, ang pagsaulog sa Valentine’s Day, paghandum ug pagpasidungog kini sa pagka-martyr ni St. Valentine. Sa ato pa, dili kay kasaulogan lang kini sa maghigugmaay.
Hinumdom ko, ambot unsa to’ng tuiga, kuyog mi tibuok nako’ng pamilya atol sa Valentine’s Night kay mangaon sa gawas. Nanguli na lang mi tungod kay puno ang tanang kan-anan. Hinoon, niadto’ng tungora, wala pa ang mga dagko’ng mall ug mga dagko’ng kan-anan.
So, kasagaran, mao kini ang atong pagsaulog sa Valentine’s Day, at least sa mga pamilya. Pangaon sa gawas. Ug pakig-date sa mga manag-uyab, ug sa mga dili sakop sa pamilya. Wa na ta’y labut niini.
Ang ako lang, hatagan nato og tukma’ng kahulogan ang adlaw ni St. Valentine. Nga ang atong paghigugmaay dili kay kutob lang sa gabii sa Valentine. Inigkaugma, adlaw na sa mga kabit maoy atong saulogon?
Let’s make every day a Valentine’s Day.