Daghang paagi pagpatay sa iring!

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghang paagi unsaon pagpatay sa iring! Kini ang sagad nga madunggan  kun maghisgot na og unsaon pagsulbad ang mga problema.

Sama sa problemado kaayong pagkab-ot sa “long and lasting peace” sa Mindanao daghang paagi aron kini kab-uton.

Ilabi na nga nagkasawop na ang Bangsamoro Basic Law nga pormahon tali sa atong gobiyerno ug sa Moro Islamic Liberation Front (MILF).

Misamot kini kahanap dihang napatyan og 44 ka mga SAF troopers ang Philippine National Police.

Isip usa ka Mindanawon mismo nagtinguha ako nga makab-ot na ang dugay na nga gipangandoy nga kahapsay ug kalinaw sa among lugar.

Apan sa akong nabantayan, ang atong gobiyerno na man hinuon ang naluya sa peace talk, kay bisan wala pa mahuman ang BBL daw nagpadiktar na man kini sa MILF nga salikwaot kaayo nga paminawon.

Asa kaha’y maayo og kining MILF ang atong luyahon ayha lang ‘ta makigsabot og kalinaw ug diktaran sa gusto sa atong gobiyerno?  Kinsa man diay ang masunod, sila o ang atong Republika?

Uyon ‘sab ‘ko sa opinion sa kadaghanan nga di maayo ang “all out war” apan daghang paagi unsaon pagpaluya sa imong kontra bisan dili pa gubaton, sama sa daghang paagi kun unsaon pagpatay sa iring.

Dili na lang ko mokwestyon sa kapasidad sa duha ka babaye nga gipayaka ni PNoy sa negotiating table atbang sa mga banggiitang leaders sa MILF kay parehas ninyo magsakit ra gihapon ang akong dughan.

Naay pasiaw sa Mindanao nga nag-ingon nga: “Maayo pang tunga-on ang “Land of Promise, Mindanao,” sa gobiyerno ang “promise” ug sa MILF ang Mindanao.

Dili angay mokompiyansa samtang nagbitbit pa sila og armas. Mao kini ang sekreto sa Israel maong nagpabilin silang lig-on batok sa nagpalibot kanila nga mga kaaway.

“The only reason Israel survived under the siege of their neighboring countries, because they don’t trust their enemies.”

Ingon bitaw sa uban, salig lang ayaw laom. Ingon ana unta ‘ta bahala og ingnon ‘ta nga segurista gumikan kay kaugmaon sa atong nasud ang atong gihisgutan.