Dili sinsero ang MILF sa kalinaw

Mas maayo nga undangon ang paghisgot og kalinaw sa Moro Islamic Liberation Front (MILF) ug ilusad ang pagpuhag sa maong rebelde’ng grupo tungod kay dili kini matinud-anon sa ilang pagpakigsabot og kalinaw sa gobiyerno tungod niini’ng mosunod nga mga basehanan.

Una, wala girespito sa MILF ang gobiyerno. Kun girespito pa sa MILF ang gobiyerno nahunong na unta ang pinusilay tali sa ilang grupo ug sa mga sakop sa PNP Special Action Force (SAF) diha’ng migitib na ang adlaw ug mibantang na sa matag usa nga sila ra diay nga naghisgot og kalinaw ang nagpinusilay.

Ikaduha, nagtigom gihapon og armas ang MILF imbes kay itugyan kini nila ngadto sa gobiyerno aron pagkab-ot og kalinaw. Gipanguha ug gitagoan pa nila ang armas sa mga sakop napatay nila nga sakop sa SAF.

Ikatulo, gitiwasan nila ang mga samaran. Imbes kay tabangan ug luwason ang mga polis nga samaran ila na hinuon kini’ng gitiwasan ug gipakasama sa hayop nga gipangtigbas bisan patay na, ug gipanguhaan sa ilang mga armas, unipormi ug cellphones. Sa balaud sa gubat ang ilang gihimo dako’ng kalapasan.

Ikaupat, giilad sa MILF ang gobiyerno ni Pangulong Noynoy Aquino. Samtang nakigsabot og kalinaw apan nakighiusa usab sila sa Bangsamoro Independent Freedom Fighters (BIFF) ang MILF ug mitabang pagtago ni Marwan nga usa sa mga terorista sa kalibotan. Kun wala pa magkasabot ang MILF ug ang BIFF sa pagtago sa terorista’ng si Marwan, ngano’ng nagkuyog man sila sa pagpakigpinusilay sa mga polis? Maayo na lang kay napatay sa SAF si Marwan.

Ikalima, mao ang kasaysayan mismo. Ang gikasabot ug kalinaw karon sa gobiyerno ni Aquino mao ra’ng dugoa sa nakigsabot og kalinaw kaniadto sa gobiyerno ni Marcos ug Ramos nga wala g’yud magmalampuson kay sila’ng mga kaliwata dili sensiro sa pagkab-ot og kalinaw.