Uban ang paghikap

Matud pa ang paghikap usa ka therapeutic kaayo nga gesture ug gani, kaniadto pa, gigamit na man kini ingon nga kabahin sa ritwal sa pag-ayo sa mga masakiton. Diha sa hilog sa masakiton, ang pari mohimo man sa pagtapion sa iyang kamot sa ulo sa masakiton. Panahon sa depression, mahinungdanon kaayo nga imong pikpikon ang abaga o dili ba kaha ang paggakus sa hingtungdan aron sa ingon makasinati siya og assurance nga wala siya mag-inusara sa maong panahon sa kalisdanan. Si Jesus nihikap dili lang sa mga masakiton kondili sa kinabuhi mismo sa katawhan niadtong mga panahona ug hangtud karon. Ang iyang pagpanudlo, ang iyang pagkinabuhi, nakahatag og dakong inspirasyon ngadto sa mga katawhan. Hagit usab kini alang kanato nga bisan pa man kun kita samaran ug dunay kakulangan dili kita hawa sa maong hagit nga mao ang paghikap usab sa kinabuhi sa uban.